Đảng ƀô̆ cheăm tơkăng kong Rờ Kơi, tơring Sa Thầy ai 13 chi ƀô̆ ƀă 176 ngế đảng viên, tung mê ai 6 chi ƀô̆ thôn kuăn ngo. Rêm hơnăm ing tơdroăng hnê mơhno dêi Tỉnh ủy Kon Tum ƀă tơring Sa Thầy, Đảng ủy cheăm hiăng tơbleăng teăm tơdrêng mâu tơdroăng kal hriâm ƀă pêi pro tiô troăng hơlâ Pôa troh tơrêm chi ƀô̆ thôn pơlê. Pôa A Êl, krâ pơlê thôn Gia Xiêng, ăm ‘nâi, ôh tá xê to 14 ngế đảng viên tung chi ƀô̆ ai tơhrâ hriâm, pêi pro tiô Pôa mê tá kuăn pơlê tung thôn xuân tơnăng vâ xêh, ôh tá êa mơhnhôk thế pêi pro tiô rơkong hnê dêi Pôa tung tơrêm tơdroăng cheăng pêi.

Tiô pôa A Êl, tơdroăng hriâm tiô Pôa kum ăm đảng viên thăm kơhnâ djâ troăng ahdrối ‘nâi hnoăng cheăng pêi dêi tơná ƀă kuăn pơlê kơhnâ pêi cheăng kâ pêi pro tro tiô troăng hơlâ, luât dêi Đảng, Tơnêi têa:

“ Đảng viên tung chi ƀô̆ đi đo djâ troăng ahdrối tung tŭm tơdroăng cheăng vâ kuăn pơlê pêi ƀối. Mâu túa mơnhông cheăng kâ dêi rơpŏng hngêi dêi đảng viên tung thôn pêi tơƀrê, đảng viên kum kuăn pơlê hdrê pêt vâ mơnhông cheăng kâ. Kuăn pơlê ki ối tung pơlê xuân tơmâng kơhnâ pêi cheăng kâ, ôh tá êa vâi lông thế mê vâi hiăng ‘nâi tơmiêt xêh rak vế pêi pro tro tiô troăng hơlâ dêi Đảng, Luât tơnêi têa. Hriâm ing Pôa kuăn pơlê hriâm ing tơdroăng ki kŭn ‘nôi mê cho tơdroăng rêh ối thế krúa lĕm troh pêi tơdroăng kân mê cho tơrŭm môi tuăn dêi rơpó tung kuăn pơlê”.

Vâ pơ-eăng rơdêi tơdroăng hriâm ƀă pêi pro tiô troăng hơlâ tuăn tơmiât, tơdroăng ki lĕm, túa pêi cheăng Hồ Chí Minh, 10 hơnăm hdrối kong pơlê Kon Tum hiăng tối nhên, mơjiâng tơdroăng kal kí dêi kong pơlê tơrêm hơnăm, tiô tơrêm hơnăm vâ pêi pro môi tuăn, châ tơƀrê khât. Sap hơnăm 2023 troh nôkố cho “Hriâm ƀă pêi pro tiô tuăn tơmiât, hiâm mơno ki lĕm, túa pêi cheăng Hồ Chí Minh ‘na ki u ối, ‘na tơdroăng vâ tá hiâm mơno, pêi cheăng veăng mơjiâng kong pơlê Kon Tum xông tơƀrê rĕng ƀă krá kak”.

Đại Tă Lê Minh Chính, Chính ủy Khu xiâm pơkuâ ngăn Mố đô̆i tơkăng kong dêi kong pơlê Kon Tum, ăm ‘nâi ki khât dêi tíu pêi cheăng:

“Ngin hnê pêi pro tơdrêng tung mâu tơdroăng mơhnhôk, mâu pơkâ chuyên đề mê cho Pơkâ kơxô̆ 847 dêi Quân ủy trung ương ‘na pơtối rak vế túa pêi cheăng ki lĕm tro dêi Mố đô̆i Pôa Hồ, khŏm plâ mơdât khu ngế ki ai tuăn ‘mêi tung tơdroăng rêh ối nôkố. Mơhnhôk ƀă pơtối rak vế tơdroăng hmâ pêi pro ki lĕm ing nah, pleăng ki rơkê tơná, tơxâng inâi Mố đô̆i Pôa Hồ, tung tơdroăng rêh ối nếo nôkố. Tung pơla tối tơbleăng pêi pro mơdêk tơdroăng cheăng séa ngăn, tăng ngăn mâu khu tơrŭm cheăng Đảng, đảng viên hlối rơtế môi tuăn ƀă tơdroăng pêi pro tơkŭm a mâu tơdroăng pêi tơƀrê tiô pơkâ dêi Đảng ƀô̆ hiăng pơcháu”.

Pêi pro tiô tơdroăng mơhnhôk “Hriâm ƀă pêi pro tiô tuăn tơmiât, tơdroăng ki lĕm, túa pêi cheăng Hồ Chí Minh, troh nôkố kong pơlê Kon Tum hiăng pro ai 2.760 túa pêi cheăng ‘ló tro, túa pêi cheăng ki ai pơxúa, tơƀrê. Mê cho túa pêi cheăng “Tơkŭm po hôp tơpui hnê mơno hlối hriâm tâp ƀă pêi pro tiô troăng hơlâ Pôa; hriâm ing Pôa ‘na tơdroăng ai tuăn pâ, veăng gum dêi rơpó mơnhông cheăng kâ-rêh ối, kơdroh kơklêa xăm kơtiê, mơjiâng thôn pơlê nếo, kring vế hyôh kong prâi; mơjiâng ƀă mơdêk tơdroăng rêh ối  tro túa lĕm vêa vong... Jâ Bùi Thị Vui, Phŏ pơkuâ hnê tơdroăng kal kí ƀă hnê mơhnhôk cheăng dêi tỉnh ủy Kon Tum, tối:

“Tơdroăng tơbleăng pêi tro tiô Pơkâ kơxô̆ 05 hiăng ai hên ngế vâ ƀă veăng pêi kơtăng, kơhnâ khât dêi kăn ƀô̆, đảng viên, kuăn pơlê tung kong pơlê. Ing mê pro pơ’lêh nhên ing tơdroăng hlê plĕng troh tơdroăng pêi pro dêi rêm râ ủy, mâu kăn, kơ koan, kong pơlê, tíu pêi cheăng. Tơdroăng pêi cheăng dêi kăn ƀô̆, kŏng chưk rế ton tro tiô khoa hok, tơbrê, achê kuăn pơlê”.

Sap tơdroăng hriâm ƀă pêi pro tiô troăng hơkâ Pôa, 10 hơnăm hdrối, ing kong pơlê Kon Tum hiăng ai hên ngế pú, mâu ngế pêi cheăng kơhnâ tung kơvâ châ khĕn kơdeăn. Lâp tung kong pơlê ai 17 khu pú hên, mâu ngế châ Ngế pro xiâm hnê ngăn Chin phuh diâp ăm Ƀâng kơdeăn khĕn 9 khu pú hên, mâu ngế châ Khu hnê cheăng kal kí diâp ăm ƀâng kơdeăn khĕn... Tơdroăng tơbleăng pêi tơƀrê tơdroăng pơkâ kơxô̆ dêi khu xiâm Kal kí hneăng 12 “ ‘na mơdêk hriâm ƀă pêi pro tiô tuăn tơmiât, hiâm mơno ki lĕm, túa pêi cheăng Hồ Chí Minh” xuân cho tơdroăng ki kal vâ kong pơlê Kon Tum xúa pêi tiô tuăn tơmiêt, hiâm mơno ki lĕm, túa pêi cheăng dêi Pôa rah xo mâu tơdroăng ki kal, pêi tơƀrê tung mâu tơdroăng cheăng pêi tơƀrê tiô pơkâ, hnoăng cheăng mơnhông rơdêi tung 10 hơnăm hdrối kố hía nah.