A Roh leh, mâu kăn teăng mâ hiăng vêh tơbâ troăng prôk 93 hơnăm ƀlêi trâng dêi Đoân Droh rơtăm Kŏng san Hồ Chí Minh ƀă rơxông ối nếo Việt Nam, môi hiâm mơno ƀă Tơnêi têa, ƀă Đảng, loi tơngah ƀă tơdroăng pơkuâ dêi Đảng. Mơdêk hiâm mơno pâ nhuô̆m tơnêi têa, khŏm mơ-eăm pêi rơdêi, hâk tơngăm hdroâng mơngế, hiâm mơno pleăng hnoăng cheăng xua tơdroăng rêh ối pơlê pơla, hbrâ rơnáu pêi cheăng, hbrâ tơdah mâu tơdroăng cheăng nếo, tơdroăng cheăng pá.

Roh kố, Khu xiâm pơkuâ Đoân Droh rơtăm hiăng diâp Pri Lý Tự Trọng hơnăm 2024 ăm 100 ngế kăn ƀô̆ đoân ki rơkê lâp tơnêi têa. Hdrối mê, khu kăn ƀô̆ đoân ki má môi veăng tơdroăng “Leh tơbâ 93 hơnăm Hâi mơjiâng Đoân Droh rơtăm Kŏng san Hồ Chí Minh ƀă diâp pri Lý Tự Trọng hơnăm 2024” hiăng troh têk nhang, pleăng hơvĭng  reăng a Kơpong chô ‘măn kế tơmeăm khoăng ton nah pôa Trần Phú, Kăn xiâm pơkuâ hnê ngăn cheăng Đảng hneăng hdrối nah, Kơpong tơbâ ngế khên tơnôu Lý Tự Trọng, Kơpong tơbâ tơmeăm khoăng ton nah Ngã Ba Đồng Lộc.