Leh tơdah châ tơkŭm po kân krip a Hngêi hôp Kuŏk hô̆i ối a ngo Capital a Pơlê kong xiâm Canberra dêi Australia, tiô tơdroăng tơdah ki tơviah ăm ngế ối a ko Chin phuh pôu păng ‘nâng Australia. Tung tơdroăng ki hơtôu tơrŭm tơroâ, pôa Anthony Albanese, Ngế pro xiâm hnê ngăn krếo thế pôa Phạm Minh Chính, Ngế pro xiâm hnê ngăn tơnêi têa pin prế kơdrâi pôa ƀă khu kăn xiâm Việt Nam.

Klêi kơ’nâi leh tơdah, péa Ngế pro xiâm hnê ngăn tơnêi têa hiăng tơpui tơno. Ngế pro xiâm hnê ngăn Australia ƀă pôa Phạm Minh Chính - Ngế pro xiâm hnê ngăn rơtế châ hlo Leh diâp mâu hlá mơ-éa tơrŭm cheăng; tơdrêng amê hlối trâm khu chêh hlá tơbeăng tơbleăng tơdjuôm klêi kơ’nâi rôh hôp, tung mê, ai tơbleăng mơjiâng Tơrŭm cheăng tung la ngiâ tŭm têk Việt Nam – Australia.

-Tung péa hâi veăng Hneăng hôp Khu râ kăn xiâm ki má môi leh tơbâ 50 hơnăm tơrŭm cheăng ASEAN – Australia, Ngế pro xiâm hnê ngăn Chin phuh Phạm Minh Chính hiăng mơdoh chôu vâ trâm mâ tâi tâng khu râ kăn pơkuâ xiâm mâu kong têa ASEAN, Australia, New Zealand ƀă Kăn xiâm chêh tôm xo rơkong ASEAN.

A mâu roh trâm mâ, Ngế pro xiâm hnê ngăn Chin phuh mơnê tơdroăng tơrŭm cheăng, tŏng kum, tối ăm dêi pó túa ki rơkê tơtro dêi mâu kong têa tung pro tơniăn ƀă mơnhông cheăng kâ; mơhno tơdroăng pói vâ mơdêk tơrŭm tung hên tơdroăng cheăng ki kal dêi ASEAN ƀă tơrŭm cheăng Việt Nam ƀă mâu kong têa, ki má lối cho ‘na kal kí - tơpui kâ ƀă kong têa ê, cheăng kâ - tê mơdró – mơ’no liăn cheăng, gâk kring – cheăng lêng, hnê hriâm – hnê mơjiâng tuăn ngôa rơkê, khoa hok – kŏng ngê̆ ƀă hía hé; pơtối tơrŭm krá tơniăn vâ mơjiâng môi ASEAN rŭm môi tuăn, môi tuăn sap apoăng troh tá tui lui, thăm tơrŭm tung khu, mơnhông hnoăng tíu xiâm tung tơleăng mâu tơdroăng gâk kring, troăng pêi ton xŏn a kơpong.

Klăng roh kố, Ngế pro xiâm hnê ngăn Chin phuh hiăng krếo khu râ kăn pơkuâ xiâm mâu kong têa pơtroh kăn teăng mâ râ Ngế xiâm veăng Hneăng hôp tơpui tơno tung la ngiâ ASEAN tiô tối hdrối tơkŭm po a Hà Nội a hâi lơ 23/4/2024.