Pôa Anŭ châ kuăn pơlê loi nhoăm rah xo pôa pro krâ pơlê sap hơnăm 2002 nah. Ƀă ivá pêi cheăng ƀă ki kuăn pơlê pâ nhoăm dêi tơná, pôa Anŭ krâ pơlê hiăng hriăn tăng troăng pro tơniăn tơrŭm môi tuăn, rơtế ƀă dêi rơpó mơnhông cheăng kâ, mơjiâng pơlê kro mơdrŏng lĕm. Ƀă tơdroăng ki tro, rêh ối achê, hmâ hlối rơkê tung tơdroăng tơpui kâ, pôa Anŭ krâ pơlê hiăng hnê tối ‘na mâu troăng rơhlâ, luât pơkâ dêi Đảng ƀă tơnêi têa troh kuăn pơlê Bơhnéa, ƀă châ kuăn pơlê hâk vâ môi tuăn.

Pôa Anŭ, krâ pơlê ăm ‘nâi:

“Á cho krâ pơlê sap ing hơnăm 2002 nah. Nôkố rêm ngế hlê nhên ki tro, ki ôh mê ‘nâi tơrŭm dêi rơpó, rơtế ƀă dêi rơpó mơjiâng pơlê  xông tơ ƀrê, ôh tá pro mâu tơdroăng ki xôi. Tơdroăng ‘nâi pâ dêi rơpó tung pơlê xuân châ tơrŭm krá kak, tâng lơ ai tơdroăng tơnôu dêi rơpó, tôu pâm dêi rơpó lơ tơbriât ki kố ki mê... ngin troh lăm pro pơlĕm teăm tơdrêng, kuăn pơlê đi đo tơmâng ƀă pêi pro ƀối’’.

Tơdrêng ƀă tơdroăng pêi tro hnoăng cheăng dêi mơngế ki “ngăn tơdroăng cheăng krâ pơlê”, pôa Anŭ krâ pơlê xuân cho ngế ki djâ troăng a hdrối pêi chiâk rơkê a pơlê kố. Sap ing lối 2h kơphế, 1 ha klâng ƀă păn mơnăn, kơnôm pêi cheăng kơhnâ, ‘nâi túa rơvât phon ăm loăng plâi, mơnăn păn, rêm hơnăm klêi riân ‘măn phá kơxô̆ liăn ‘no hrê apoăng pêi cheăng, rơpŏng hngêi pôa châ xo dêi dâng 150 rơtuh liăn. 

Kơxô̆ liăn pêi lo mê hâi teăm hên kơnôm ‘nâi kơdĭng, hrê tro tơdroăng mê pôa hiăng châ mơjiâng pro hngêi rơdâ lĕm, châ rôe tơmeăm ki kal xua tung pêi cheăng ƀă rêh ối rêm hâi.

Pakĭng mê, pôa Anŭ, krâ pơlê ối tơmâng hnê tối ăm kuăn pơlê drêng trâm xơpá, hliăng tiâ. Môi tiah a hơnăm 2020, tung pơlê ai ngế lăm pêi cheăng hơngế vêh xua tâ COVID 19,  lâp pơlê pêi pro tơdroăng klâ kơtăn. Pôa Anŭ  mơ-eăm kơhnâ veăng kum phái, kơchâi plâi pôm, têa măm, po ăm kuăn pơlê, hlối xo pêi hnoăng cheăng kum mâu rơpŏng ki tro klâ kơtăn ối tơkŭm môi tíu ngăn hngêi trăng. Rak ngăn í pêap tung mâu hâi klâ kơtăn.  Mâu tơdroăng cheăng pêi mê pro ăm kuăn pơlê thăm nhoăm, pâ kơ pôa.

Mâu tơdroăng pêi ai pơxúa dêi pôa Anŭ, krâ pơlê hiăng veăng ‘no hnoăng pro pơ’lêh pơlê cheăm. Mâu râ kăn pơlê cheăm tối, pôa châ xo hên ƀâng kơdeăn khĕn, hlá mơ-éa kơdeăn kheăn... Pôa Sing, Kăn hnê ngăn Vi ƀan cheăm Glar, tơring Đak Đoa, kong pơlê Gia Lai, tối ‘na  pôa Anŭ, krâ pơlê ki rơkê kơhnâ a pơlê cheăm:

“Pôa Anŭ cho môi ngế krâ pơlê ki djâ troăng a hdrối, châ kuăn pơlê tung pơlê pâ nhoăm, pôa ‘nâi dêi hnoăng cheăng tơná, đi đo mơ-eăm kum kuăn pơlê tung pơlê. Rêm hdroh kuăn pơlê trâm xơpá, hliăng tiâ, pôa tăng troăng veăng kum hơlêm. Rơpŏng hngêi pôa pêi cheăng châ tơƀrê mê pôa hmâ lăm tăng tŏng kum hên mâu ngế ki pá puât.

Tung plâ to lâi hơnăm pro krâ pơlê, pôa đi đo pê klêi tơdroăng cheăng tơná ƀă pơlê, châ mâu kăn cheăm, tơring khĕn kơdeăn”.

Lối 20 hơnăm châ kuăn pơlê xo pro krâ pơlê, mơhé vâ tung pơlê, lơ pơlê ki ê hiăng trâm tơdroăng kân kŭn pôa Anŭ krâ pơlê đi đo ai mâ rơtế veăng tŏng kum, mơnhên mâu tơdroăng a pơlê. Pôa tối nhên hleăng, kum kuăn pơlê mơnế Bơhnéa nhoăm pâ ƀă ngăn cho tíu ki tơngah krá kak a pơlê.