A rôh pêi cheăng, Vi ƀan kong pơlê Dak Lak hiăng tối 18 tơdroăng tơdjâk troh ki xơpá, tơvâ tơvân tung tơdroăng rak ngăn tơnêi têa ‘na tơmeăm khoăng ƀă hyôh kong prâi. Tung mê, tơvâ hên tơdroăng rak ngăn tơnêi  ai xiâm rêi ing chiâk deăng rak ngăn kong. Ki hên tơnêi ki ai xiâm tơnêi pêi chiâk, pêt loăng kong pơcháu tơvêh ăm tơná cheăm tơring  nôkố xuân cho Vi ƀan hnê ngăn râ cheăm rak ngăn.

Tối tơbleăng mơgêi a rôh pêi cheăng, pôa Đặng Quốc Khánh, Ngế xiâm ngăn tơmeăm khoăng tung tơnêi ƀă Hyôh kong prâi ăm ‘nâi, khu kăn lăm pêi cheăng dêi khu xiâm ki lăm pêi cheăng a mâu kong pơlê vâ tăng troăng tah ki xơpá, tơvâ tơvân ăm cheăm tơring. Pakĭng mê, Khu xiâm ối tơmâng xo mâu tơdroăng ing mâu cheăm tơring vâ rĕng mơjiâng klêi Pơkâ djâ luât tơnêi hơnăm 2024 xúa tung rêh ối.

Krê ƀă tơdroăng ki kal má môi cho tơnêi pêi chiâk tơnêi kong, pôa Đặng Quốc Khánh pơkâ thế kong pơlê Dak Lak thế séa ngăn tâi tâng ƀă klâ tiô túa vâ drêng Luât tơnêi hơnăm 2024 xêt kô châ mơnhên hên ƀăng tơnêi.