Kơxê hâi lơ 3/4 , a tíu pêi cheăng dêi Chin phuh, pôa Lê Minh Khái  Ngế pro xiâm hnê ngăn tơnêi têa hiăng tơdah pôa Lee Sung Hee, Kăn hnê ngăn Khu Tơrŭm pêi chiâk deăng tơnêi têa Hàn Quốc ( NACF)  dế ai rôh lăm pôu Việt Nam. Pôa Lê Minh Khái  ăm ‘nâi, khế hdrối nah pôa ƀă Ngế pro xiâm hnê ngăn kong têa Hàn Quốc Kyungho Choo hiăng pơkuâ hôp Tơpui tơno ‘na Tơrŭm cheăng kâ râ Ngế xiâm phŏ hnê ngăn tơnêi têa Việt Nam - Hàn Quốc rôh má 2.

Péa pâ hiăng tơpui  tơno môi tuăn hên tơdroăng kal vâ mơnhông tơrŭm cheăng kâ pơla péa tơnêi têa. Pôa Lê Minh Khái, Ngế pro xiâm hnê ngăn tơnei têa tối loi khât, ki hiăng hmâ rơkê cheăng dêi tơná, NACF xuân kô mơ-eăm tơrŭm ƀă Chin phuh Việt Nam kơjo kum mơnhông ‘na chiâk deăng, mơnhông thôn pơlê, ing mê veăng ‘no hnoăng mơnhông cheăng kâ rêh ối dêi Việt Nam.

Pôa Lê Minh Khái prế pôa Lee Sung Hee xuân tơpui tơno mâu tơdroăng kal tơdjâk troh tơkŭm po kơchơ tơbleăng tê tơmeăm pêi lo ing chiâk deăng a Pusan; tơdroăng pêi cheăng dêi Hngêi rak liăn NH Bank a Việt Nam; mơdêk tê rôe tơmeăm pơla péa pâ, ƀă hên ki ê vâ mơdêk tơrŭm cheăng pơla 2 tơnei têa tung kơvâ pêi cheăng tơrŭm mơnhông mơdêk  ai pơxúa, tơƀrê tung la ngiâ.