Kơxê lơ 13/1, a tíu pêi cheăng dêi Chin phuh, pôa Lê Minh Khái, Kăn cheăng tung Khu xiâm pơkuâ hnê ngăn Đảng, Ngế pro xiâm phŏ hnê ngăn tơnêi têa hiăng tơdah pôa Park Hark Kyu, Ngế xiâm pơkuâ Grup Samsung Electronics pơkuâ ‘na liăn ngân dế lăm pôu pêi cheăng a tơnêi têa pin. A rôh tơdah , pôa Lê Minh Khái tối nhên tơdroăng ki kal tơpui kâ pơla Việt Nam - Hàn Quốc ai mâu hvêa prôk mơdêk tơƀrê ƀă dế tung pơla mơnhông mơdêk tơniăn lĕm.

Hàn Quốc hiăng chiâng kong têa tơrŭm cheăng dêi Việt Nam tung mâu tơdroăng, malối cheăng kâ, tê mơdró ƀă ‘no liăn cheăng. Kố xuân cho tơdroăng ki tơ’lêi hlâu vâ Samsung xuân môi tiah mâu khu mơdró Hàn Quốc pơtối po rơdâ ‘no liăn cheăng a Việt Nam tung la ngiâ. 

Ngế xiâm pơkuâ Samsung ăm ‘nâi pôa hiăng troh a  Việt Nam lối 20 hdrôh  vâ tí tăng ‘nâi ‘na tơdroăng tê mơdró, tung mê ai tơdroăng pơkâ ‘no liăn cheăng mơjiâng hngêi kơmăi Samsung a Thái Nguyên. Ngế xiâm pơkuâ Samsung ăm ‘nâi: Samsung xuân hiăng krếo mâu kŏng ki kuăn ki mơjiâng pro màn hình, tơmeăm ‘na điê̆n tưh, vâ pơtối ‘no liăn cheăng a Việt Nam tung la ngiâ.