Roh lăm pôu pêi cheăng râ tơnêi têa dêi pôa Lương Cường, Kăn xiâm hnê ngăn tơnêi têa troh a kong têa Egipto ai ki kơnâ ton xŏn, tơdjâk troh ton xŏn troh tơdroăng mơnhông mơdêk dêi tơrŭm cheăng Việt Nam – Egipto. Tơkŭm po a drêng Việt Nam dế mơ-eăm kêi đeăng mâu pơkâ, hnoăng cheăng ƀă tơpui kâ ƀă kong têa ê ki Hneăng hôp Đảng má XIII pơkâ, pêi pro hên roh mơnhông ‘na troăng pơkâ pêi, hngêi trăng, troăng klông gum mơnhông mơdêk tơnêi têa, tơmiât troh Hneăng hôp má XIV dêi Đảng Kŏng san Việt Nam; hbrâ mơgêi Tơdroăng tơkêa bro “Mơnhông tơrŭm cheăng pơla Việt Nam ƀă mâu kong têa Trung Đông – Châu Phi hneăng hơnăm 2016 – 2025’’ ƀă Tơdroăng tơkêa bro ‘’Mơnhông tơrŭm cheăng Việt Nam ƀă Khu tơrŭm châu Phi hneăng hơnăm 2021 – 2025’’.

Tung pơla roh lăm pôu pêi cheăng, pôa Lương Cường, Kăn xiâm hnê ngăn tơnêi têa kô ai mâu roh tơpui tơno khu râ kăn xiâm ƀă pôa Abdel Fattah Al Sisi, Kăn xiâm pơkuâ kong têa Egipto; trâm mâ tơpui tơno ƀă Ngế pro xiâm hnê ngăn tơnêi têa Mostafa Madbouly, Kăn xiâm hnê ngăn Kuô̆k hô̆i râ má môi Abdel – Razek ƀă Kăn xiâm hnê ngăn Kuô̆k hô̆i râ má péa El – Gebaly; xông tơpui troăng hơlâ Tí pêi cheăng Liên đoân Arab.