Kơmăng lơ 6/8, pôa Lương Cường, Kăn xiâm hnê ngăn tơnêi têa ƀă Kơdrâi pôa rơtế khu râ kăn teăng mâ râ xiâm Việt Nam hiăng troh pơlê kong xiâm Luanda, pơxiâm roh lăm pôu pêi cheăng râ Tơnêi têa Kŏng hoa Angola tiô rơkong krếo thế dêi Kăn xiâm pơkuâ kong têa Angola – pôa João Manuel Gonçalves Lourenço ƀă kơdrâi pôa. Kố cho roh lăm pôu pêi cheăng râ kăn xiâm pơkuâ tơnêi têa Việt Nam sap hơnăm 2008.

Roh lăm pôu dêi pôa Lương Cường, Kăn xiâm hnê ngăn tơnêi têa tơkŭm po tro drêng péa tơnêi têa leh tơbâ 50 hơnăm mơjiâng tơrŭm tơpui kâ ƀă kong têa ê.

Tiô tối hdrối tung pơla sap ing hâi lơ 6 troh hâi lơ 8/8, pôa Lương Cường, Kăn xiâm hnê ngăn tơnêi têa kô ai mâu roh tơpui tơno khu râ kăn xiâm ƀă Kăn xiâm pơkuâ kong têa Angola – pôa João Manuel Gonçalves Lourenço; trâm mâ tơpui tơno ƀă Kăn xiâm hnê ngăn Kuô̆k hô̆i Carolina – pôa Cerqueira; pêi cheăng ƀă khu râ kăn pơkuâ Đảng Phong trao nhân yân giải phóng Angola; trâm mâ mơngế Việt Nam rêh ối pêi cheăng a Angola ƀă veăng leh tơbâ 50 hơnăm mơjiâng tơrŭm tơpui kâ pơla péa tơnêi têa.

Ki rơhêng vâ tối, Kăn xiâm hnê ngăn tơnêi têa kô ai ƀai xông tơpui ki kal a Kuô̆k hô̆i Angola, ing mê pơtâng hnê tối troăng hơlâ ‘na môi Việt Nam pói vâ veăng kum hên ăm tơdroăng kal kí lâp plâi tơnêi, cheăng kâ lâp plâi tơnêi ƀă rơkê kuăn mơngế.