A mâu roh tơpui tơno, pôa Abdel Fattah Al Sisi, Kăn xiâm pơkuâ kong têa Ejiptô mơnhên roh lăm pôu pêi cheăng râ kăn xiâm Tơnêi têa dêi Kăn xiâm hnê ngăn tơnêi têa ƀă Khu râ kăn teăng mâ râ xiâm Việt Nam cho môi tơdroăng ki kal, po môi hneăng tơrŭm cheăng nếo ăm tơrŭm cheăng péa tơnêi têa klêi lối 60 hơnăm mơjiâng tơrŭm tơpui kâ ƀă mơdêk tơrŭm cheăng to Khu tơrŭm cheăng ton xŏn.

Péa kăn xiâm pơkuâ hiăng tơpui tơno ‘na tơdroăng mơnhông cheăng kâ-rêh ối pơlê pơla rêm tơnêi têa, phiu ro mâu troăng mơnhông mơdêk châ tơƀrê tung tơrŭm cheăng Việt Nam – Ejiptô, mơnhên khŏm mơ-eăm ăm tơrŭm cheăng pơla tung tâi tâng mâu kơvâ cheăng. Tơpui tơno ‘na mâu tơdroăng kơpong ƀă lâp plâi tơnêi rơtế tơmâng, pôa Lương Cường, Kăn xiâm hnê ngăn tơnêi têa kheăn kơdeăn hnoăng ối tung dế, tơleăng dêi Ejiptô tung tơdroăng ti tăng mâu troăng pro pơlĕm chiâng pơtê tơdroăng tơplâ tơplong a kơpong.