Drêng rôh lăm pôu râ kăn xiâm  kŏng têa Êjipto, pôa Lương Cường Kăn xiâm hnê ngăn tơnêi têa ƀă kơdrâi pôa rơtế ƀă mâu kăn xiâm dêi Việt Nam hiăng trâm mâu kăn ƀô̆, mơngế pêi cheăng a Tíu pêi cheăng teăng mâ, mâu kơ koan ƀă kăn teăng mâ mơngế Việt Nam a Êjipto.  Tung chôu phut hmâ, tơtô, teăng mâ kăn xiâm Đảng ƀă Tơnêi têa, pôa Lương Cường Kăn xiâm hnê ngăn tơnêi têa  pơtroh rơkong rơkâu ăm tâi tâng mâu ngế Việt Nam ki rêh ối hriâm tâp ƀă pêi cheăng a kong têa Êjipto, mâu kăn ƀô̆, mâu ngế pêi cheăng a tíu Teăm mâ Việt Nam  ƀă mâu on veăng mâu tơdroăng mơnê pâ khât ƀă mâu rơkong rơkâu ki lĕm má môi.

Tơdroăng ăm ‘nâi ƀă kuăn pơlê mơngế Việt Nam a Êjipto, Kăn xiâm hnê ngăn tơnêi têa tối, kơ’nâi vâ chê 40 hơnăm hơ’lêh nếo, Việt Nam dế khên tơnôu hvêa prôk tung chal nếo, chal mơnhông pro kro mơdrŏng ƀă hơniâp ro, mơ-eăm chiâng kong têa ki dế mơnhông pêi cheăng ƀă kơmăi kơmok túa nếo, pê lo liăn vâ tối ki dâ dâng tâk hên a hơnăm 2030, ƀă troh hơnăm 2045, chiâng kong têa mơnhông, pê lo liăn hên.

Kăn xiâm hnê ngăn  tơnêi têa loi khât kuăn pơlê kô pơtối rak vế pêi pro tơdroăng pâ nhoăm tơnêi têa, rơtế mơhnhôk kuăn pơlê mơ-eăm xông rơdêi, rak tro luât hlối tơrŭm tơrôa ƀă pơlê pơla a tíu ki pin ối, veăng ‘no hnoăng pêi cheăng kơhnâ khât tung mơnhông dêi Êjipto  xuân môi tiah tơrŭm cheăng pơla péa kong têa; hlối rak nâl Xuê̆n ƀă túa vêa vong ki lĕm dêi hdroâng mơngế, hnê ăm mâu rơxông  kuăn cháu kơ’nâi.