A roh pêi cheăng, teăng mâ khu râ kăn pơkuâ 3 kong pơlê Lâm Đồng, Bình Thuận ƀă Dak Nông hiăng tơbleăng tơdroăng pêi pro troăng hơlâ pêi pro tơmot chiâng môi 3 kong pơlê, troăng pêi tơkŭm po khu râ kăn pơkuâ mâu kơ koan pêi cheăng tơnêi têa, tơmot chiâng môi râ cheăm ƀă mơjiâng troăng pêi tơkŭm po khu râ kăn pêi cheăng tơnêi têa 2 râ; tơbleăng tơrŭm pêi pro hriăn plĕng, mơjiâng mơ-éa ki kal Hneăng hôp Đảng ƀô̆ kong pơlê Lâm Đồng nếo, mơ-éa ki kal Hneăng hôp Đảng ƀô̆ râ cheăm.

Klêi kơ’nâi ai troăng hơlâ tơmot chiâng môi 3 kong pơlê, mâu râ kuăn pơlê a Lâm Đồng xuân tối tơdroăng tơmâng tŏng gum ‘na tơdroăng prôk lăm, tăng tíu kâ, tíu ối ăm kăn ƀô̆ ing péa kong pơlê Dak Nông ƀă Bình Thuận kô vêh a tíu xiâm pơkuâ tơnêi têa pro a pơlê kong kơdrâm Đà Lạt pêi cheăng. Pôa Hồ Trung Hiếu, ối a bêng 4, pơlê kong kơdrâm Đà Lạt tối:

‘’Á tô tuăn ‘nâng drêng vâ chê 2.000 nhŏng o kăn ƀô̆ kŏng chưk dêi péa kong pơlê Dak Nông ƀă Bình Thuận kô vêh, tiah mê tơdroăng tăng tíu kâ ối, kum tơdroăng kal vâ ăm mâu nhŏng o kố môi tiah lâi. Xua mơni drêng nhŏng o vêh a kố, tơdroăng prôk lăm kô trâm pá puât, tơdroăng kal vâ kâ ối a Đà Lạt, tâng ton xŏn mê kô tâk tơdroăng kal vâ tíu ối. Á pói vâ kong pơlê Lâm Đồng kal ai mơnhên troăng prôk la ngiâ ƀă troăng pêi thâ vâ tơleăng’’.

Ahdrối tơdroăng tơmâng, tô tuăn dêi kuăn pơlê ‘na tơdroăng prôk lăm, tíu kâ ối ăm kăn ƀô̆ drêng tơmot chiâng môi kong pơlê, pôa Nguyễn Ngọc Phúc, Phŏ kăn hnê ngăn Vi ƀan kong pơlê Lâm Đồng tối ăm ‘nâi, kong pơlê hiăng ai troăng pêi pro ăm tơdroăng kố.

‘’Ngin hiăng séa ngăn dâng 10 tíu vâ kăn ƀô̆ mâu kong pơlê troh pêi cheăng. Tíu ối, hngêi tơnêi têa mê xuân dế séa ngăn, mơnhên vâ tơniăn ăm nhŏng o ai tíu ối, tíu kâ tơniăn. Rơxế prôk lăm, ngin riân tâng 50 tíu mê Dak Nông kal dâng 10 toăng rơxế môi xôh, prôk tung hâi Tĭng lơ kơxo hâi môi vâ nhŏng o lăm pêi cheăng, Bình Thuân môi chât to lâi, péa chât toăng rơxế. Ngin xuân pâ thế Chin phuh ai troăng pơkâ pêi, troăng hơlâ tŏng gum kơxô̆ liăn tơdrêng ăm mâu kăn ƀô̆ kố châ kơxô̆ liăn vâ prôk lăm’’.

Pôa Nguyễn Hòa Bình, Phŏ Ngế pro xiâm hnê mơhno má môi Chin phuh kheăn kơdeăn tơdroăng môi tuăn dêi 3 kong pơlê tung tơdroăng hnê mơhno, tơrŭm pêi pro hnoăng ‘na tơmot chiâng môi, rah xo bro lế lĕm tro khu pêi cheăng tơnêi têa, hbrâ lĕm tro mâu tơdroăng xiâm ăm hneăng hôp Đảng mâu râ. Tơdrêng amê tơtrŏng, mâu kong pơlê kal pơtối mơnhông hiâm mơno tơrŭm môi tuăn pêi pro hnoăng cheăng tơdjuôm, ki má lối cho tung mơjiâng mơ-éa ki kal hneăng hôp; rah xo bro lế lĕm tro mâu kăn pêi cheăng ăm hneăng hôp, ăm mâu kơ koan, tíu pêi cheăng; hnê mơhno pêi pro châ tơƀrê mâu hnoăng cheăng mơnhông cheăng kâ rêh ối pơlê pơla.

Ki rơhêng vâ tối tơtrŏng, kong pơlê Lâm Đồng thế pêi lĕm tro tơdroăng kal kí, hiâm tuăn tơmiêt tung kăn ƀô̆, đảng viên; rah xo mơngế pêi cheăng tơtro, tơmiât troh ki pơxúa tơdjuôm.

‘’Thế pêi lĕm tro tơdroăng mơhnhôk, kal kí ‘na hiâm mơno mâu tíu pêi cheăng, kơvâ cheăng, mâu cheăm, mâu tơring la ngiâ kô pơtê tâi tâng. Nôkố môi tuăn tơdroăng xing xoăng hnoăng dêi Đảng pin xing xoăng tơdroăng cheăng ki klâi pêi ki mê, laga ôh tá chiâng tung hiâm mơno, tuăn pâ ai tơdroăng ki kố chiâng ki tá. Á pơkâ thế, pin pơkâ troăng pêi, túa pêi, tơdroăng kal vâ ƀă tơdroăng pêi tơdâng tơ’mô ôh tá tơdjâk pakong, tơdrăng tung tơdroăng tơleăng mê cho pro ăm loi kân má môi. ‘Na tơdroăng krê pin xuân ai tơdroăng ki pleăng’’.

‘Na tơdroăng xing xoăng, rah xo tơtro mơngế pêi cheăng, pôa Nguyễn Hòa Bình mơnhên, Phŏ Ngế pro xiâm hnê mơhno má môi Chin phuh tối: Kố cho hnoăng cheăng ki thâ, mâu kong pơlê thế pêi tiô mâu pơkâ dêi Đảng ƀă Tơnêi têa vâ pêi tro, krá, tơniăn tơbleăng tơdrăng, tơdrăng. Thế ai pơkâ ‘na tơdroăng pơkâ kăn ƀô̆ ối má môi, tơniăn ivá, tơdroăng ki loi tơngah ƀă tơdroăng ki tơtro pơla mâu kong pơlê; tơtrŏng tơdroăng rah xo kăn ƀô̆ ki xiâm a râ cheăm, tơxâng pơkâ hnoăng cheăng nếo.

Tơdroăng tơmot chiâng môi pái kong pơlê Lâm Đồng, Dak Nông ƀă Bình Thuận ôh tá xê to môi troăng hơlâ kân vâ rah xo bro lế lĕm tro khu pêi cheăng tơnêi têa, mơdêk châ tơƀrê pơkuâ, mê ối cho troăng prôk ton xŏn tơmiât troh mơnhông krá tơniăn kơpong Pá hdroh Tây Nguyên ƀă duyên hải Nam Trung Bộ. Mâu tơdroăng ki tơmâng tơxâng dêi kuăn pơlê ƀă kăn ƀô̆ ‘na tíu ối, prôk lăm, xuân môi tiah tơdroăng tơkŭm po, mơngế pêi cheăng hiăng châ khu râ kăn pơkuâ kong pơlê ƀă Chin phuh tơmâng, hnê mơhno kơtăng.

Ƀă tơdroăng môi tuăn, khŏm mơ-eăm ƀă hiâm mơno tơrŭm môi tuăn, pái kong pơlê dế chôa ‘lâng hbrâ inhên vâ la ngiâ mơjiâng môi troăng pêi khu pêi cheăng nếo, tơniăn ƀă châ tơƀrê, tơxâng pơkâ mơnhông mơdêk tung hneăng nếo.