Tơpui a Hneăng hôp, pôa Nguyễn Hòa Bình, Phŏ Ngế pro xiâm hnê ngăn tơnêi têa pơkâ thế BIDV hriăn ngăn, tơpui tối leăng, tối hdrối pơkâ mơ’no mâu tơdroăng pơkâ pêi, hnoăng cheăng, troăng hơlâ vâ mơjiâng BIDV chiâng môi Hngêi rak liăn Tê mơdró Tơnêi têa ki xiâm ai túa pơkâ kân, pêi cheăng tơƀrê, ai ivá pêi cheăng tơxup Lâp plâi tơnêi.

BIDV kal pơtối pêi pro tro hnoăng cheăng dêi Hngêi rak liăn Tê mơdró Tơnêi têa; ki xiâm, ngế hnê mơhno pơkuâ djâ kơchơ mơdró. Kơhnâ hbrâ rơnáu ƀă djâ troăng ahdrối tung pêi pro mâu pơkâ troăng hơlâ tŏng gum dêi Đảng, Chin phuh, Hngêi rak liăn Tơnêi têa Việt Nam. Xúa ki pơxuá, tơdroăng tơngah ƀă tơrŭm kong têa ê, mơhnhôk hên kơxô̆ liăn vâ mơnhông cheăng kâ; tơbleăng hên túa pơkâ tơdroăng ăm mung mâu tơdroăng tơkêa kân, ivá cheăng tơƀrê, ai ivá tơdjâk, tơƀrê khât tung tơdroăng cheăng kâ.