Phŏ Ngế pro xiâm hnê ngăn tơnêi têa tơmâng xo mâu tơdroăng veăng gum kal khât dêi VNPT tung hneăng cheăng hdrối nah, malối cho hnoăng cheăng xiâm tung tơbleăng Chin phuh điê̆n tưh, pơhlêh kơxô̆ tơnêi têa ƀă rak vế hnoăng pơkuâ tung măng. Maluâ trâm hên xơpá tung tơnêi têa ƀă a kong têa ê, VNPT xuân ối tối rơdêi tíu ối tung kơvâ viễn thông, kong ngê̆.

Pôa Nguyễn Hòa Bình, phŏ Ngế pro xiâm hnê ngăn tơnêi têa pơkâ thế Đảng ƀô̆ VNPT pơtối mơdêk hiâm mơno pơhlêh nếo, mơdêk rơdêi hriăn ngăn, pơkuâ khoa hok kong ngê̆, mơnhông tơniăn liăn ngân vâ pro ivá mơnhông tơƀrê. VNPT kal prôk hdrối tung pêi pro Pơkâ 57 dêi Khu xiâm pơkuâ tơdroăng kal kí ‘na mơjiâng khoa hok, kong ngê̆ ƀă pơhlêh kơxô̆ tơnêi têa.