Kơxo lơ 12/1, a tíu pêi cheăng xiâm Đảng, pôa Nguyễn Phú Trọng, Kăn pơkuâ hnê ngăn Đảng, Kăn hnê mơhno cheăng pơkuâ rôh hôp má 23 dêi khu xiâm ‘na hbrâ mơdâ kâ kơluâ, pro ôh tá tro vâ tơpui tơno, ăm veăng hnê tối ‘na mâu tơdroăng ki kal. Khu hnê mơhno cheăng séa ngăn mâu tơdroăng cheăng pêi dêi hơnăm 2022; tơdroăng cheăng pêi tung hơnăm 2023 dêi Khu hnê mơhno cheăng; Klêi hnê mơhno tơleăng mơnhên mâu tơdroăng cheăng, tơdroăng tơkêa bro  dêi Khu hnê mơhno séa ngăn, hnê mơhno ing klêi hôp rôh má 21 dêi khu hnê mơhno cheăng troh nôkố.

A rôh hôp, tơpui tơno, Khu hnê mơhno cheăng môi tuăn tối, hơnăm 2022, tơdroăng hbrâ mơdât kâ kơluâ pro ôh tá tro, tung tâi tâng mâu ngế ƀă tơƀrê tâ. Malối rơtế ƀă hbrâ mơdât kâ kơluâ, pro ôh tá tro ƀă tơdroăng cheăng kăn ƀô̆, pơxâu phak kơtăng ngế ki lâi ai xôi, ôh tá ăm pro kăn, thế pơtê tro tiô pơkâ dêi Đảng, Tơnêi têa, lôi ăm tơdroăng cheăng tơniăn lĕm, ‘mâi mơnhông tuăn loi dêi kuăn pơlê veăng ‘no hnoăng ki kal tung pêi pro ăm ƀlêi trâng pơxúa cheăng kâ - rêh ối hơnăm 2022.