Kơxo hâi lơ 7/4, a tíu pêi cheăng xiâm Đảng, pôa Nguyễn Phú Trọng - Kăn xiâm pơkuâ hnê ngăn Đảng pơkuâ hneăng hôp Khu xiâm kal kí, Khu kăn hnê ngăn Đảng veăng hnê tối ‘na tơdroăng Tơkêa bro “Mơgêi 15 hơnăm pêi tiô Pơkâ 27 dêi Khu kăn xiâm Đảng hneăng 10 ‘na mơjiâng khu kăn rơkê tung rơxông nôkố mơdêk cheăng ƀă kơmăi kơmok, mơnhông tơnêi têa”; tơmâng Vi ƀan séa ngăn xiâm tơnêi têa tơbleăng mâu tơdroăng dêi khu séa ngăn xiâm kal kí, Khu kăn hnê ngăn Đảng hơnăm 2022 ƀă tối Tơdroăng tí tăng séa ngăn dêi Khu xiâm kal kí, Khu kăn pơkuâ hnê ngăn Đảng hơnăm 2023.

Khu xiâm kal kí tối nhên: hnoăng cheăng dêi Đảng, Tơnêi têa, dêi mâu khu cheăng kal kí ƀă tâi tâng pơlê pơla cho mơjiâng khu ki rơkê rơdêi tá kơxô̆, ƀă tá tơdroăng cheăng ƀă tuăn ngôa tung mâu tơdroăng pơkâ pêi, hnoăng cheăng pêi mơnhông cheăng kâ - rêh ối pơlê pơla. Tơdjâk troh tơdroăng tí tăng séa ngăn Khu xiâm kal kí, Khu kăn pơkuâ hnê ngăn Đảng hơnăm 2023, Khu xiâm kal kí, Khu kăn hnê ngăn Đảng hiăng pơkâ mơjiâng 5 khu lăm séa ngăn dêi Khu xiâm kal kí, 5 khu lăm séa ngăn khu kăn pơkuâ hnê ngăn Đảng vâ tí tăng ngăn nhên 30 khu tơrŭm cheăng Đảng dêi râ xiâm Tơnêi têa.