Kơxê lơ 17/1, a tíu pêi cheăng xiâm Đảng, pôa Nguyễn Phú Trọng, Kăn xiâm hnê ngăn Đảng hiăng tơdah pôa Kim Jin Pyo, Kăn xiâm hnê ngăn Kuô̆k hô̆i Hàn Quốc dế ai rôh pôu pêi cheăng a Việt Nam. A rôh tơdah, pôa Nguyễn Phú Trọng tối nhên, péa pâ pơtối tơrŭm krá tơniăn, ăm tơrŭm cheăng pơla péa pâ mơnhông rế hía rế tơƀrê tâ, tung mê tơtrŏng mơdêk mâu rôh lăm pôu, trâm mâ, pơtroh mâu khu râ kăn xiâm vâ mơdêk hlê plĕng dêi rơpó, rơtế tơpui tơno ‘na troăng hơlâ pơkâ kân vâ mơnhông tơrŭm cheăng pơla péa tơnêi têa; mơdêk tơrŭm pơla mâu khu xiâm, kơvâ cheăng, kong pơlê péa tơnêi têa.

Kăn xiâm hnê ngăn Kuô̆k hô̆i Hàn Quốc rơhêng vâ péa pâ pơtối mơdêk mâu tơdroăng ki tơƀrê tung tơrŭm cheăng pơla péa pâ tung mâu kơvâ cheăng kal kí, cheăng kâ, mơhno túa lĕm tro, trâm mâ kuăn pơlê, gak kring pơlê pơla cheăm bêng; tối nhên Hàn Quốc ngăn nhuô̆m hnoăng cheăng dêi Việt Nam tung mâu tơdroăng cheăng la ngiâ ƀă tơchĕng tơmiât rơkê nếo ƀă kơpong, tung mê ai tơmiât rơkê tơrŭm pơla Hàn Quốc – ASEAN.