Kơmăng hâi lơ 29/3/2023, a Tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ ngăn Đảng hiăng tơpui tơno ƀă pôa Joe Biden, Kăn xiâm pơkuâ kong têa Mih. Pôa Nguyễn Phú Trọng, Kăn xiâm pơkuâ hnê ngăn Đảng tối, Việt Nam mơ-eăm tiô troăng rơhlâ tơpui kâ tơniăn, pơkuâ dêi, hơniâp lĕm, tơrŭm tơrôa ƀă mơnhông mơdêk, hên túa, hên troăng rơhlâ tơrŭm, hbrâ hdrối ƀă mơ-eăm kơhnâ tơrŭm cheăng ƀă lâp plâi tơnêi, cho pú hmâ, cho kong têa tơrŭm nhoăm loi dêi rơpó ƀă kong têa tung khu kơhnâ mơ-eăm, ‘nâi hnoăng  tơná pêi ki klâi tung khu kong têa lâp plâi tơnêi.

Kăn xiâm pơkuâ ngăn Đảng ăm ‘nâi: Việt Nam vâ tơrŭm ƀă mâu kong têa tung lâp plâi tơnêi tung mơdêk tơrŭm ƀă tơpui kâ, ‘mâi mơnhông hơniâp lĕm, mơnhông mơdêk. Việt Nam hâk vâ Mih veăng vâ môi tuăn tung hnoăng cheăng xiâm dêi ASEAN, rơtế ƀă mâu kong têa tung ASEAN mơdêk hvái ngăn ASEAN ‘na Ấn Độ Dương - Thái Bình Dương.

Pôa Joe Biden, Kăn xiâm pơkuâ kong têa Mih tối Viêt Nam cho kong têa tơrŭm ki kal, môi tuăn ƀă Việt Nam “Tơniăn krê, khên tơnôu ƀă hơniâp ro’’, pơtối nhoăm tơniăn  ai hnoăng pơkuâ tơnêi têa ƀă ki rơdêi kal kí dêi Việt Nam. Xuân  a rôh tơpui tơno, pôa Joe Biden tơpui ‘na tơdroăng lâp plâi tơnêi môi tiah hbrâ ví hyôh kong prâi hơ’lêh, ‘mâi mơnhông cheăng kâ - rêh ối klêi kơ’nâi ai pơreăng kân, tơrŭm môi tuăn dêi rơpó ‘na rêh ối dêi mơngế.