Pôa Nguyễn Phú Trọng koh mơnê ‘na tơdroăng tŏng kum dêi Đảng, Chin phuh, kuăn pơlê Sinuâ ƀă Việt Nam tung hneăng tơplâ tơbriât xo dêi tơnêi têa vâ mơjiâng tơnêi têa chiâng môi hneăng hdrối nah ƀă mơjiâng chuh ngiah xah hô̆i hâi kố. Mơnhên tối ‘ló khât tơdroăng Đảng ƀô̆, khu kăn hnê ngăn ƀă kuăn pơlê Quảng Tây hên hơnăm hdrối mê hía nah đi đo rak vế, pơtối mơdêk mâu kơpong, hngêi xối tơbâ ai tơdjâk troh Pôa Hồ Chí Minh, Kăn xiâm hnê ngăn tơnêi têa pin hneăng hdrối ƀă Kăch măng Việt Nam a Quảng Tây.

Pôa Nguyễn Phú Trọng hiăng hâk ro xua hlo ai mơnhông tung tơrŭm cheăng pơla Quảng Tây ƀă mâu kong pơlê a kơpong achê tíu tơkăng kong dêi Việt Nam, pơtối djâ troăng ahdrối ƀă mơdêk hiâm mơno ki djâ troăng hdrối tung tơrŭm pêi cheăng kâ - tê mơdró, pơkâ mơ’no tung tơrŭm ôm hyô, kring vế gak ngăn, tơrŭm tơpui tơno pơla kuăn pơlê, rơtế dêi pó mơjiâng troăng tíu tơkăng kong hơniâp ro, tơniăn lĕm, nhŏng o, pú hmâ.