Hdrối Têt Lo hơnăm nếo Quý Mão 2023 ƀă klăng roh leh tơbâ 93 hơnăm Hâi mơjiâng Đảng, tiô khôi hmâ vâi krâ nah dêi hdroâng mơngế, hâi lơ 11/1, a pơlê kong kân Hồ Chí Minh, pôa Nguyễn Xuân Phúc, Kăn xiâm hnê ngăn tơnêi têa hiăng troh pleăng hơvĭng reăng, chôu nhâng kơ Pôa Hồ Chí Minh, Kăn xiâm hnê ngăn tơnêi têa hneăng hdrối; lăm pôu, diâp kơxuô tơmeăm, rơkâu Têt rơpŏng mâu Kăn pơkuâ hnê ngăn cheăng Đảng, Tơnêi têa hiăng hlâ. Chôu nhâng, pleăng hơvĭng reăng a Tíu chôu ‘măn rak vế tơmeăm khoăng ton nah, pôa Nguyễn Xuân Phúc ƀă Khu râ kăn hiăng tu ko tơbâ Pôa Hồ Chí Minh, Kăn xiâm hnê ngăn tơnêi têa hneăng apoăng  - Ngế  khên tơnôu tơleăng lĕm hdroâng mơngế - Ngế mơhno túa lĕm tro rơkê má môi dêi hdroâng mơngế Việt Nam.

Mơhno hiâm mơno pâ mơnê trâu hơngế troh Pôa Hồ Chí Minh – hiăng pleăng rơxông rêh tơná ăm tơdroăng tơleăng lĕm hdroâng mơngế, môi tuăn tơnêi têa, mơjiâng Tơnêi têa Việt Nam xah hô̆i chuh ngiah hơniâp lĕm, tơniăn krê, môi tuăn. Troh chôu nhang tơbâ Đăi tươ̆ng Lê Đức Anh, Kăn hnê ngăn tơnêi têa sap hơnăm 1992 – 1997, pôa Nguyễn Xuân Phúc tối nhên, mơhé pôu râng hnoăng cheăng ki lâi, pôa Lê Đức Anh xuân djâ tâi hiâm mơno, veăng kum hên tơdroăng ki kal tung mâu tơdroăng kân dêi tơnêi têa.