Pôa Nguyễn Xuân Phúc, Kăn xiâm hnê ngăn tơnêi têa rơkâu ƀok phop pơkuâ tơniăn lĕm; pơtroh rơkong rơkâu troh tâi tâng mâu ƀok, châ, mâu ngế ki hriâm vâ bro ƀok jâ phop, kuăn pơlê ki tiô khôp phop tung lâp tơnêi têa tơdah môi rơnó hơngui nếo ai hên ivá, tơniăn, tơdroăng khôp tơniăn lĕm.

Kăn xiâm hnê ngăn tơnêi têa tối nhên, Đảng, Tơnêi têa đi đo ngăn nhuô̆m ƀă rak vế hnoăng tơniăn krê ‘na tơdroăng ki loi tĭng tiô khôp dêi kuăn pơlê, rak tơniăn tơdroăng khôp tro luât, pôi tá pơtê tơdroăng tŏng kum mơnhông mơdêk cheăng kâ rêh ối pơlê pơla, bro tơ’lêi hlâu ăm kuăn pơlê ki tiô khôp ƀă mâu ƀok, jâ mâu tơdroăng khôp, tung mê ai tơdroăng Khôp phop Việt Nam pêi pro tro tơdroăng ki hriâm bro ƀok tro tơdrăng ƀă pêi tâi hnoăng cheăng dêi kuăn pơlê ƀă Tơnêi têa.