Tơbleăng a rôh Hôp, pôa Phạm Minh Chính Ngế pro xiâm hnê ngăn tơnêi têa tối nhên: hơnăm 2025 ai pơxúa kal kí, cho hơnăm pêi rĕng, tơƀrê vâ pê klêi mâu tơdroăng pơkâ mơnhông cheăng kâ-rêh ối 5 hơnăm 2021-2025; lâp tơnêi têa dế mơ-eăm má môi, mơ-eăm pê klêi mâu pơkâ mơnhông cheăng kâ - rêh ối pơlê pơla hơnăm 2025, malối ki tak cheăng kâ tung plâ hơnăm châ 8% tơngi klêng; pakĭng mê tơkŭm tơ’noăng pê klêi tơdroăng cheăng pơcháu vâ koh tơbâ 80 hơnăm hâi mơjiâng Tơnêi têa; koh hâk hneăng hôp Đảng ƀô̆ rêm râ, vâ troh hneăng hôp Đảng tung lâp tơnêi têa rôh má 14.

Ngế pro xiâm hnê ngăn tơnêi têa tối, sap nôkố ta troh hâi lơ  31/12/2025 bú ối klăng 5 khế, tơdroăng cheăng ối hên, tung pơla mê pơkâ thế mơjiâng pro thế prôk hdrối, po troăng, pro xiâm vâ mâu kơvâ cheăng, kong pơlê, pro xiâm ki nếo ăm tơnêi têa, po troăng mơnhông tơƀrê nếo, mơdêk tơbriât tê tơmeăm pê lo tung tơnêi têa ƀă kong têa ê.