Riân kơxô̆ liăn ăm sap apoăng hơnăm troh hâi lơ 30/4 hơnăm kố ai lối 128 rơpâu rơtal liăn, châ lối 15% tiô pơkâ Ngế pro xiâm hnê ngăn Chin phuh pơcháu, kéa kô há a hơnăm 2024  xo liăn ngân tơnêi têa 110 rơpâu rơtal liăn, châ lối 16%.

Tiah mê, ‘na ki pơxúa, hơnăm 2025 xo liăn ngân hên tâ tâng vâ pơchông ƀă hơnăm nah dâng 18 rơpâu rơtal liăn, la kơxô̆ liăn xo ing hngêi rak liăn ngân tâng vâ pơchông ƀă liăn Ngế pro xiâm hnê ngăn Chin phuh pơcháu iâ tâ. Tối tơbleăng a rôh Hôp, pôa Phạm Minh Chính, Ngế pro xiâm hnê ngăn tơnêi têa tối tiah kố: Pin dế ối tung mâu hâi khế ton nah, ƀă tơdroăng “pêi rĕng, pêi rơkê” la ‘no liăn mơjiâng tơmeăm khoăng tơnêi têa ôh tá xê to “pêi rĕng, pêi rơkê” mê  ối pêi hrá tâ nếo.

Tối nhên mâu tơdroăng cheăng mơ-eăm dế mơdêk môi tiah: Khoa hok kŏng ngê̆; pơ’lêh hriăn plĕng ki nếo, pơ’lêh kơxô̆, cheăng kâ sap ing pêi pro tê klê mê pêi ing apoăng nếo, cheăng kâ xúa tuăn ngôa rơkê, cheăng kâ krê dêi kuăn pơlê... nếo pơxiâm, hâi hlo tơƀrê klâi mê thế mơ-eăm, mơhnhôk hnê pêi pro tiô ton nah, tung mê ai mơhnhôk ‘no liăn pro tơmeăm khoăng. Ngế pro xiâm hnê ngăn Chin phuh  khĕn kơdeăn, khĕn mơhá, khu xiâm kơvâ cheăng, kong pơlê xo liăn ngân ‘no mơjiâng tơmeăm khoăng ki lĕm, hlối tơhrâ pro lĕm tro nếo, mơnhên hnoăng cheăng khu pú hên, mâu ngế tơdjâk troh, ing mê pơkâ troăng hơlâ, ăm tơtro vâ mơhnhôk rĕng châ xo liăn ngân tung la ngiâ.