Kơxo lơ 3/4, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ po Rôh hôp ‘no tơdrêng ing troăng hyôh internet Chin phuh ƀă kong pơlê khế 3/2023 vâ rơtế hvái ngăn tơdroăng tơbleăng Mơgêi dêi Tơnêi têa, Tơdroăng pơkâ dêi Kuô̆k hô̆i, ki kal cho tơpui tơno tơdroăng cheăng kâ rêh ối pơlê pơla khế 3 ƀă 3 khế apoăng hơnăm 2023, tơdroăng tơbleăng Pơkâ kơxô̆ 01 dêi Chin phuh; Tơdroăng ‘mâi mơnhông ƀă mơdêk cheăng kâ rêh ối pơlê pơla, 3 tơdroăng ki xiâm dêi tơnêi têa; tơdroăng ki xing xoăng, ‘no liăn pei cheăng tơdjuôm.

‘Na hnoăng cheăng, troăng hơlâ ki xiâm tung la ngiâ, Ngế pro xiâm hnê ngăn tơnêi têa pơkâ thế tơkŭm pêi pro tro, tơƀrê mâu tơdroăng pơkâ, tơdroăng mơgêi dêi tíu xiâm Đảng, Khu xiâm pơkuâ tơdroăng kal kí, kăn pơkuâ xiâm, Kuô̆k hô̆i, Chin phuh, Ngế pro xiâm hnê ngăn Chin phuh. Rak vế rơkê plĕng, tơdroăng tơƀrê dêi mâu tơdroăng tơkêa, tơdroăng ki kal pơtroh ăm Rôh hôp Tơnêi têa má 7 ƀă Hneăng hôp má 5 Kuô̆k hô̆i hneăng 15.

Pơtối kơjo kum rak vế tơniăn cheăng kâ kân, hbrâ mơdât pro mơhrê liăn ngân, mơdêk tơdroăng mơnhông, rak vế mâu tơdroăng pơkâ ki kân. Mơdêk rơdêi tơdroăng mơjiâng pro tê mơdró; tăng cheăng pêi, tŏng kum tơdroăng rêh ối ăm kuăn pơlê.