Kơxê lơ 28/5, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah Khu kăn Kuô̆k hô̆i péa đảng Kuô̆k hô̆i râ má péa Mih pôu ƀă pêi cheăng a Việt Nam, xua pôa John Moolenaar, Kuô̆k hô̆i râ má péa, kong pơlê kân Michigan, ngế cheăng tung Vi ƀan Chuẩn chi Kuô̆k hô̆i râ má péa Mih, pro ngế xiâm pơkuâ djâ khu kăn kố.

A rôh tơdah, Ngế pro xiâm hnê ngăn Chin phuh tối rơdêi, Việt Nam kơhnâ mơ-eăm ƀă troăng hơlâ tơpui kâ tơniăn krê, pơkuâ pêi xêh, po rơdâ, pơhlêh chiâng hên kơvâ, tơrŭm ƀă hên kong têa; tối nhên troăng pơkâ mơjiâng cheăng kâ tơniăn krê, pơkuâ ngăn xêh tro ƀă hbrâ rơnáu tŭm, kơhnâ mot tơrŭm ƀă kong têa ê trâu hơngế, ai pơxúa ƀă tơƀrê.

Ngế pro xiâm hnê ngăn Chin phuh pâ thế pôa John Moolenaar ƀă mâu Kuô̆k hô̆i Mih pơtối tơmâng ngăm, môi tuăn tơdroăng mơnhông dêi tơrŭm cheăng pơla péa pâ, tung mê, ai tơdroăng séa ngăn ăm Việt Nam lo ing inâi séa ngăn mơdât tê tơmeăm ngi kong têa ê tung la ngiâ ƀă mơnhông tung pơla séa ngăn mơnhên Pơkâ cheăng kâ kơchơ tê mơdró dêi Việt Nam.

Pôa John Moolenaar, Kuô̆k hô̆i râ má péa ƀă mâu Kuô̆k hô̆i ki tơrŭm cheăng dêi khu kố tơhrâ mơ-eăm mơnhông tơrŭm cheăng ƀă tơpui tơno ‘na nâp hnoăng liăn mơhá pơla péa tơnêi têa.