Tung tơdroăng ki tơrŭm tơroâ, loi tơngah ƀă tơdrăng, péa Ngế pro xiâm hnê ngăn tơnêi têa hiăng môi tuăn tiah kố, tơrŭm tơroâ kôi hmâ Việt Nam – Sinuâ xua pôa Hồ Chí Minh, kăn xiâm hnê ngăn tơnêi têa hneăng apoăng, pôa Mao Trạch Đông, Kăn xiâm hnê ngăn kong têa ƀă mâu rơxông kăn pơkuâ hneăng hdrối dêi péa tơnêi têa hiăng mơjiâng ƀă tơbêng cho kế tơmeăm ki kơnía tơdjuôm dêi péa Đảng, péa tơnêi têa, kal ôh tá la lâi pơtê pơtó, rak vế ƀă mơnhông; tối nhên ki kal dêi tơrŭm cheăng pơla péa pâ ƀă tơdroăng ki mơnhông dêi rêm tơnêi têa xuân môi tiah hơniâp lĕm, tơniăn, tơrŭm, mơnhông dêi kơpong ƀă lâp plâi tơnêi.

‘Na túa tơmiât mơdêk tơrŭm cheăng tung la ngiâ, péa Ngế pro xiâm hnê ngăn tơnêi têa môi tuăn kô thăm mơdêk pơtroh, tơrŭm, mơeăm mơdêk tơrŭm cheăng pơla péa pâ mot tung hneăng mơnhông nếo, malối cho mơdêk mâu kơvâ tơrŭm cheăng, malối cho tơrŭm cheăng kâ, tê mơdró mot trâu hngế, tơƀrê, krá tơniăn, rak vế troăng hơlâ tơrŭm cheăng pơla Khu xiâm pơkuâ ngăn lêng, khu xiâm ngăn Kŏng an péa tơnêi têa, rơtế mơjiâng tíu tơkăng kong péa tơnêi têa chiâng troăng tơkăng kong hơniâp lĕm, tơniăn, tơrŭm ƀă mơnhông mơdêk.