Vâ chê 500 ngế veăng hôp rôh pơxiâm po ƀă tơdroăng ai mâ dêi Ngế pro xiâm hnê ngăn Chin phuh tơnêi têa Kŏng hòa Dân chủ Nhân dân Lếo - Kăn xiâm hnê ngăn ASEAN 2024; pôa Kao Kim Hourn, Ngế chêh tôm xo rơkong ASEAN; mâu khu xiâm, kăn teăng mâ, mâu teăng mâ Chin phuh mâu kong têa ASEAN, mâu kong têa tơrŭm cheăng tơpui kâ, mâu khu tơrŭm cheăng lâp plâi tơnêi.

Hneăng hôp tơpui tung la ngiâ ASEAN 2024 pơxá “Mơjiâng kuăn pơlê ASEAN mơnhông tơƀrê rĕng, krá tơniăn, xo kuăn pơlê pro xiâm” cho môi tơdroăng hriĕn plĕng ki kal xua pôa Phạm Minh Chính - Ngế pro xiâm hnê ngăn tơnêi têa tối a hneăng hôp mâu kăn xiâm ASEAN rôh má 43 a khế 9/2023.

Kố cho tơdroăng tơmiêt ki nếo dêi Việt Nam ƀă púi vâ pro tơ’lêi hlâu tơdjuôm ăm mâu kong têa tung khu ASEAN xuân môi tiah mâu pú hmâ tơdroăng tơrŭm cheăng ASEAN, kuăn pơlê ASEAN veăng ‘no hnoăng mơnhông tơƀrê, troăng rơhlâ mơnhông tung la ngiâ dêi ASEAN. Tơbleăng a hneăng hôp, pôa Phạm Minh Chính tối nhên, vâ pêi tro tiô mâ Ngăn tung mơnhông ASEAN hơnăm 2045, kal thế pêi 5 tơdroăng mơnhông tơƀrê ƀă Việt Nam kô pơtối mơ-eăm tâ nếo tung la ngiâ môi tuăn hên túa cheăng dêi ASEAN.