Kơxo hâi lơ 22/5, a tíu pêi cheăng Chin phuh, pôa Phạm Minh Chính Ngế pro xiâm hnê ngăn Chin phuh pơkuâ hôp Chin phuh tơpui ‘na tơdroăng mơjiâng Luât khế 5 hơnăm 2025, ăm hnê tối, tơbleăng 2 tơdroăng tơkêa bro  luât ƀă 4 tơdroăng Pơkâ thế mơjiâng luât. A rôh hôp, mâu kăn tơpui ‘na tơdroăng ăm hnê tối 2 tơdroăng tơkêa luât, mê cho: Tơdroăng tơkêa luât tơleăng phâk (‘mâi hơ’lêh), tơdroăng tơkêa Luât rup kroăng, kroăng pơtân ƀă oh tá ăm lo ing tíu ki ối ƀă 4 rơdroăng pơkâ thế mơjiâng Luât mê cho: Luât ‘nâi kơdĭng liăn, mơdât tá hrê liăn hmâng vâ; Luât séa nhăn mơnhên tro tiô luât (‘mâi hơ’lêh); Luât pro tơniăn krúa kế kâ (‘mâi hơ’lêh); Luât pơ’leăng mâ mơngế.  

Mâu tơdroăng veăng hnê tối a rôh hôp tơpui hên ‘na tơdroăng pơkâ pleăng môi kế tung châ mơngế ki phâk; tơdroăng pêi pro pơkâ dêi tíu phâk tung tơdroăng xo tơmeăm khoăng liăn ngân ki mơngế ki xôi, nhŏng o xiâm vâ pleăng dêi nâp ăm hngêi phâk vâ ăm tơleăng mơnhên, nhŏng o xiâm ngế ki phâk nâp a tíu pơkuâ ngăn kroăng phâk  vâ pơtroh ăm kơ koan tơleăng mơnhên; tơdjâk troh mơngế ki phâk cho mơngế kong têa ê; ‘na pêi tro tơdroăng pơkâ phâk; tơdroăng  pêi pro tiô luât pơklât thế pơlât pơreăng rơxok, hnoăng cheăng dêi kơ koan kŏng an tơrŭm ƀă hlối tăng mơngế ki tro rup khŏm thế pơlât la châ hdâ ‘na luât tŏng gum mơdêk ki tơƀrê tung mâu ngế mơnhên ‘na luât ƀă khu ki mơnhên ngăn tiô luât.