Kơxê lơ 26/1, cho hâi má 5 Têt, pôa Phạm Minh Chính, Ngế pro xiâm hnê ngăn tơnêi têa séa ngăn pơkâ kơtăng tơdroăng tơkêa bro troăng kân Nha Trang – Cam Lâm ối tung tơdroăng tơkêa bro troăng kân Bắc – Nam peăng mâ hâi Lo hneăng má 1, pôu, rơkâu Têt kăn ƀô̆, kŏng nhân viên veăng ai mâ a tơdroăng tơkêa bro troăng kân. Troăng kân Bắc – Nam peăng mâ hâi Lo pơla hơnăm 2017 – 2020 ai tâi tâng ki xŏn 652,86 km châ klâ bro chiâng 11 tơdroăng tơkêa (3 tơdroăng tơkêa ‘no liăn pêi cheăng tơrŭm ‘no liăn tơdjuôm krê PPP ƀă 8 tơdroăng tơkêa ‘no liăn cheăng cheăng tơdjuôm.

Tung mê, tơdroăng tơkêa bro troăng kân Nha Trang – Cam Lâm xŏn lối 49km, tơkâ luâ tơring Diên Khánh, Cam Lâm ƀă Pơlê kong kơdrâm Cam Ranh, kong pơlê Khánh Hòa. Tơdroăng tơkêa kố ai tâi tâng lối 7.600 rơtal liăn, tung mê, ki hên cho liăn Tơnêi têa veăng kum dâng 2.967 rơtal liăn. Lăm drô troăng tơdroăng tơkêa, Ngế pro xiâm hnê ngăn tơnêi têa phiu ro hlo troăng prôk kố dế châ bro, hên tíu bro hiăng klêi.

A tíu dế bro, Ngế pro xiâm hnê ngăn tơnêi têa khĕn kơdeăn mâu kơ koan, tíu pêi cheăng, khu kăn ƀô̆, kŏng nhân hiăng pêi cheăng ƀă hiâm mơno ki hơniâp ro. Ngế pro xiâm hnê ngăn tơnêi têa pơkâ thế mâu tíu pêi cheăng kal rĕng bro dế kong prâi tơniăn lĕm 3 rôh 4 khu; tơdroăng ki bro athế rak tơniăn dâi, rĕng, nhên pôi tá mơhrê liăn hmâng vâ, rak vế tơniăn tung pêi cheăng ăm kŏng nhân ƀă tơniăn ăm kuăn pơlê, hbrâ mơdât kâ kơluâ, bro mơhrê liăn ngân tê kơtê.