Hâi lơ 9/4, pôa Phạm Minh Chính - Ngế pro xiâm hnê ngăn tơnêi têa ƀă Khu kăn pêi cheăng dêi Chin phuh hiăng pêi cheăng ƀă Khu kăn Đảng kong pơlê Điện Biên ‘na tơdroăng mơnhông cheăng kâ-rêh ối. Teăng mâ Chin phuh, pôa Phạm  Minh Chính khĕn kơdeăn mâu tơdroăng mơ-eăm ƀă pêi tơƀrê dêi Đảng ƀô̆, mâu kăn, mâu lêng ƀă kuăn pơlê dêi kong pơlê Điện Biện tung mâu hơnăm hdrối nah, hiăng veăng ’no hnoăng mơnhông tơdjuôm dêi tơnêi têa.

Tung la ngiâ Ngế pro xiâm hnê ngăn tơnêi têa pơkâ thế, kong pơlê tơmâng khân, tơbleăng hnê pêi tơƀrê Pơkâ Hneăng hôp má 13 dêi Đảng, Pơkâ dêi Khu xiâm Kal kí ƀă Pơkâ Hneăng hôp Đảng ƀô̆ roh má 14. Mơnhông cheăng kâ rêh ối rĕng ƀă krá tơniăn tiô tơdroăng pơtối pêi mâu tơmeăm khoăng hiăng ai, ki rơdêi, ing tuăn mơ-eăm.

Tơkŭm mơjiâng, pơtối pêi tơƀrê kơpong cheăng kâ xiâm dêi kong pơlê; ‘mâi hơ’lêh ăm tơtro troăng rơhlâ mâu kơvâ cheăng kâ, pêi pro rơdêi, mơnhông pêi chiâk, pêt kong, ôm hyô, pro hngêi kơmăi on tơhrik, chiâ xo tơmeăm khoăng meăm tung tơnêi, kơ’măi kơmok uâ pơliê po ƀă cheăng kâ a tíu tê mơdró tơkăng kong. Rak ƀă pơtối vế mâu tơdroăng ki pơxúa ‘na mơhno túa lĕm tro tung hmâ pêi sap nah, ki xiâm dêi mâu hdroâng kuăn ngo ƀă kuăn mơngế Điện Biên. Kring tơniăn pơlê pơla cheăm bêng tíu tơkăng kong.