Kơxo lơ 12/4, pôa Phạm Minh Chính, Ngế pro xiâm hnê ngăn Chin phuh pơkuâ po rôh hôp má 5 Khu hnê mơhno Tơnêi têa mâu kế tơmeăm, tơdroăng tơkêa ki kal dêi tơnêi têa, ki xiâm dêi kơvâ troăng prôk pơto tơmeăm. A rôh hôp, pôa Phạm Minh Chính, Ngế pro xiâm hnê ngăn tơnêi têa ăm ‘nâi, tung pơla sap ing hơnăm 2021 – 2026, Tơnêi têa xoăng 400 rơpâu rơtal liăn ăm tơdroăng ki pro troăng prôk.

Kố cho tơdroăng cheăng ki kân. Mâu kế tơmeăm, tơdroăng tơkêa châ xing xoăng liăn tung lâp lu sap ing peăng Hdroh troh peăng Kơnhŏng, ƀă mâu tơdroăng tơkêa pro troăng prôk sap ing peăng Kơnhŏng troh peăng Hdroh, peăng mâ hâi lo – peăng mâ hâi lu ƀă tơdjêp 6 to kơpong cheăng kâ rêh ối pơlê pơla.

Xua mê, Khu hnê mơhno cheăng athế đi đo séa ngăn, pơkâ kơtăng vâ pêi klêi hnoăng cheăng pơkâ mơ’no. Ngế pro xiâm hnê ngăn tơnêi têa ăm ‘nâi, nôkố Tơnêi têa hiăng xing xoăng liăn; ai túa pơkâ, troăng hơlâ tŏng kum; Pơkâ kơtăng tơdroăng tŏng kum xơpá, tơvâ tơvân; tơdroăng mơdêk mâu kế tơmeăm, tơdroăng tơkêa a tơdroăng ki tơkŭm pêi pro.

Ngế pro xiâm hnê ngăn tơnêi têa pơkâ thế mâu ngế cheăng tung Khu hnê mơhno chẻăng, kăn ppơkuâ mâu khu xiâm, kơvâ cheăng, kong pơlê, mơdêk khât hiâm mơno, hnoăng cheăng pôu râng a ngiâ Đảng, Tơnêi têa, kuăn pơlê, djâ troăng ahdrối, kơhnâ, hbrâ rơnáu hdrối, rơkê tung hnê mơhno, pơkuâ; hbrâ mơdât tơdroăng kâ kơluâ ƀă hên ki ê tung pêi pro mâu kế tơmeăm, tơdroăng tơkêa ki kal dêi tơnêi têa, ki xiâm cho dêi kơvâ ngăn troăng prôk ƀă rơxế kơtâu.