Kơxo lơ 27/1, pôa Phạm Minh Chính, Ngế pro xiâm hnê ngăn tơnêi têa hiăng lăm séa ngăn tơdroăng pêi pro tơdroăng tơkêa bro ƀă tăng tơnêi tơdroăng tơkêa bro mơ’no liăn mơjiâng troăng kân pakĭng 4 – Kơpong pơlê kong xiâm Hà Nội. Troh ngăn a kố, pôa Phạm Minh Chính tối nhên, túa ki rơkê tơtro hlo hdối nah, tơdroăng tăng tơnêi hmâ hrá, laga hneăng kố tơdroăng tăng tơnêi châ pêi pro rĕng, hên tơdroăng tơkêa bro châ 80% ‘na tăng tơnêi, tơdroăng kố kal khât, pơkâ ăm tơdroăng tơkêa bro troăng klông.

Ngế pro xiâm hnê ngăn tơnêi têa kheăn kơdeăn 3 kong pơlê, pơlê kong kân Hà Nội, kong pơlê Bắc Ninh, Hưng Yên tơrŭm krá tơniăn tung tăng tơnêi. Ngế pro xiâm hnê ngăn tơnêi têa pơkâ, mâu khu ki mơjiâng pro, drêng mơjiâng pro kal rĕng pêi drêng kong prâi lĕm, mơhnhôk vâi krâ kuăn pơlê ăm tơnêi, drêng mơjiâng pro mê pêi pro 3 ca 4 khu vâ ai troăng rĕng má môi tơniăn, dâi lĕm, rak kong kế lĕm.