Drêng tơdah hơnăm nếo, Têt tiô khôi hmâ dêi hdroâng mơngế - Rơnó Hơngui Quý Mão 2023, kơxo lơ 18/1 (cho lơ 27 khế 12), teăng mâ kăn pơkuâ Đảng, Tơnêi têa, pôa Phạm Minh Chính, Ngế pro xiâm hnê ngăn Chin phuh hiăng troh rơkâu Têt rơpŏng, chôu nhăng tơbâ Ngế pro xiâm hnê ngăn tơnêi têa hneăng hdrối cho pôa Phạm Văn Đồng prế Đăi tươ̆ng Võ Nguyên Giáp a hngêi krê dêi Ngế pro xiâm hnê ngăn tơnêi têa hneăng hdrối, hngêi krê dêi Đăi tươ̆ng Võ Nguyên Giáp a Pơlê kong xiâm Hà Nội.

A hngêi krê dêi pôa Phạm Văn Đồng a kơphô̆ Đặng Thái Mai, Hà Nội, pôa Phạm Minh Chính pleăng reăng, chôu nhăng tơbâ pôa Phạm Văn Đồng, Ngế pro xiâm hnê ngăn tơnêi têa hneăng hdrối – Kăn pơkuâ ki rơkê, loi tơngah, ngế ki chêh văn kân má môi dêi tơnêi têa, ngế ki tơpui kâ rơkê dêi Đảng, Tơnêi têa ƀă kăch măng Việt Nam, hok tro rơkê dêi Hồ Chí Minh.

Pôa Phạm Minh Chính, Ngế pro xiâm hnê ngăn Chin phuh xuân troh chôu nhăng tơbâ Đăi tươ̆ng Võ Nguyên Giáp ƀă rơkâu Têt rơpŏng hngêi Đăi tươ̆ng a kơxô̆ hngêi 30, troăng Hoàng Diệu, Hà Nội.