Tơdroăng tơkêa bro kố tâi tâng ki xŏn dâng 519 km, ƀă tâi tâng kơxô̆ liăn mơ’no lối 22.350 rơtal liăn. Tối, tơdroăng tơkêa bro Troăng kơxái on tơhrik 500kV mrô 3 kơpong ing Quảng Trạch troh Phố Núi ai kơnâ kal khât, tơdroăng pêi pro tơdroăng tơkêa bro tơxâng pơkâ pêi pro, laga kơxô̆ tơdroăng cheăng cho kân, vâ pêi kêi đeăng mâu tơdroăng tơkêa bro tiô pơkâ, pôa Phạm Minh Chính, Ngế pro xiâm hnê ngăn Chin phuh pơkâ mâu khu xiâm, kơvâ cheăng, kong pơlê pơtối tơrŭm, séa ngăn mâu tơdroăng tơdjâk; teăm tơleăng tơdrêng mâu tơdroăng tơvâ tơvân tiô hnoăng, tơniăn teăm tơdrêng ki rơkê, ki dâi lĕm ƀă tơniăn pêi cheăng, ki má lối cho rak tơniăn pêi cheăng a mâu tíu ki pá puât, tơvâ tơvân ƀă drêng kong prâi ôh tá tơ’lêi hlâu.

Ngế pro xiâm hnê ngăn tơnêi têa tối nhên, mâu kơ koan, kong pơlê, tíu cheăng tơrŭm krá tơniăn ƀă dêi pó ƀă kuăn pơlê, khu tê mơdró xua pơkâ tơdjuôm, ví pro mơdoh, tơdroăng ki ôh tá lĕm tro, kâ kơhveăm liăn ngân tung tơdroăng pêi pro tơdroăng tơkêa bro, tiô hiâm mơno ‘’tơmâng, tŏng kum, lo pêi cheăng”, “rơtế pêi, rơtế ƀlêi trâng ƀă rơtế châ pơxúa’’.