A hôp tơpui tơno, pôa Phạm Minh Chính, Ngế pro xiâm hnê ngăn tơnêi têa mơnhên, roh lăm pôu pêi cheăng Việt Nam achê kố dêi pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ cho tơdroăng hdró mơnhông mơdêk, mơnhên troăng pêi ton xŏn ăm tơrŭm pơla péa Đảng, péa tơnêi têa.

Ngế pro xiâm hnê ngăn tơnêi têa pơkâ thế péa pâ rak tơpui tơno râ kăn xiâm đi đo; mơdêk ó rơdêi tơrŭm cheăng kâ, tê mơdró, mơ’no liăn cheăng tiô troăng tơdâng tơ’mô, tơdrêng amê po rơdâ tơrŭm cheăng tung kơvâ khoa hok kŏng ngê̆, pơhlêh nếo tơmiêt pêi rơkê, mơjiâng ivá nếo ăm tơrŭm cheăng pơla péa pâ.

Pôa Lý Cường môi tuăn ƀă pơkâ ƀă mơnhên Sinuâ hbrâ tơrŭm krá tơniăn ƀă Việt Nam vâ pêi pro hlê plĕng tơdjuôm pơla khu râ kăn pơkuâ péa tơnêi têa; thăm tơpui tơno, pro krá tơniăn loi tơngah kal kí ƀă mơdêk păng ‘nâng, ki rơhêng vâ tối tung kơvâ tê mơdró, mơ’no liăn cheăn ƀă tơdjêp troăng klông.