Pơtroh rơkong khéa hơ’nêng troh nhŏng o mâu rơpŏng ki ai ngế hlâ, ai ngế hía, Ngế pro xiâm hnê ngăn tơnêi têa tối mâu tơdroăng ki xơpá, khéa hơ’nêng dêi kuăn pơlê kơpong ki tro kong mêi khía mơhot têa kân lân lu. Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng tơrŭm ƀă kăn pơkuâ kong pơlê vâ mơdêk rĕng tơdroăng ki ‘mâi mơnhông mâu tơmeăm khoăng tơ’nhiê, pôi tá ăm kuăn pơlê kơklêa, ôh ti ai pơkeăng, ôh ti ai têa krúa vâ ôu ƀă hbrâ mơdât pơreăng tâ tú klêi kơ’nâi kong mê têa lân lu.

Mâu troăng prôk tro tơnêi tơhnâp athế rĕng kui tah, ‘mâi xĕn kuăn pơlê troh ối tíu tơniăn. Athế ‘mâi mơnhông tơdroăng pêi cheăng kâ. Mâu hngêi trung hriâm ki tro tơ’nhiê xuân athế rĕng ‘mêng rơnêu ăm mâu vâi muăn hbrâ mot hơnăm hriâm nếo. Mâu hngêi pơkeăng cheăm, tíu khăm pơlât ăm kuăn pơlê tâng tro tơ’nhiê xuân athế lăm ngăn, rĕng ‘mêng rơnêu.