Tiô Ngế pro xiâm hnê ngăn tối, tơrŭm cheăng cheăng kâ, tê mơdró, ‘no liăn cheăng, khoa hok kơmăi kơmok, hơ’lêh nếo hriăn plĕng ki nếo... cho mâu tơdroăng ki xiâm kal khât vâ mơdêk tơrŭm cheăng pơla péa tơnêi têa tung cheăng kâ nếo rế vâ mơnhông tơƀrê tŭm tơdroăng, laga tá châ tơƀrê môi tiah pôa Nguyễn Phú Trọng - Kăn xiâm pơkuâ hnê ngăn Đảng ƀă pôa Joe Biden - Kăn xiâm pơkuâ kong têa Mih púi vâ.

Pôa Phạm Minh Chính - Ngế pro xiâm hnê ngăn tơnêi têa púi vâ Mih tối tơdjuôm ƀă mâu khu mơdró Mih tối krê rơtế ƀă Việt Nam pêi pro pơkâ tối kơpêng mê hlối rơtế hbrâ ví mâu tơdroăng pơloăng mơnúa tung lâp plâi tơnêi, tâi tâng kuăn pơlê, môi tiah: Hơ’lêh hyôh kong prâi, kơxô̆ kuăn mơngế rế krâ, tơdroăng tâ tú pơreăng, rế pa ai tơmeăm khoăng... tung pơla Việt Nam ối hên mâu tơdroăng xơpá xua pơla ton hơnăm hdrối tro tơdroăng tơplâ pro tơ’nhiê, cho tơnêi têa ki dế mơnhông, cheăng kâ dế vâ pơ’lêh, ki vâ mơnhông dêi tơdroăng cheăng kâ hâi kâi pêi pro ki kân, hâi kâi trâng drêng trâm tơdroăng pá ing pa kong.

Tơpui mơgêi a rôh pêi cheăng, pôa Phạm Minh Chính khĕn kơdeăn ƀă hlối nhoăm mâu tơdroăng veăng hnê tối dêi mâu kăn khu mơdró dêi Hô̆i đong tê mơdró Mih - ASEAN; Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng pơtối tí tăng hlê plĕng, pơtối tơmâng ƀă veăng hnê tối tiâ tơdroăng kơ-êng, pro tơ’lêi hlâu ăm mâu khu mơdró cheăng kâ.