Hâi lơ 16/1, tung rôh lăm pêi cheăng a Cao Bằng, pôa Phạm Minh Chính, Ngế pro xiâm hnê ngăn tơnêi têa hiăng séa ngăn tơnêi tíu dêi tơdroăng Tơkêa bro troăng kân tơdrăng Đồng Đăng - Trà Lĩnh ƀă tơdroăng tối tơbleăng Kơpong pêi cheăng kâ Tíu tê mơdró tơkăng kong Cao Bằng - mâu tơdroăng mơnhông nếo tung pơxá pêi pro ƀă kong pơlê kố. A tíu tê mơdró lâp plâi tơnêi Tà Lùng, tơring Quang Hòa, pôa Phạm Minh Chính, Ngế pro xiâm hnê ngăn tơnêi têa hiăng tơmâng pôa Trần Hồng Minh Kăn hnê ngăn Đảng kong pơlê Cao Bằng  tối tơbleăng ‘na tơdroăng pơkâ, troăng rơhlâ mơnhông mơdêk kơpong cheăng kâ Tê mơdró kăng kong Cao Bằng.

Tiô pơkâ, Kơpong cheăng kâ tê mơdró tơkăng kong Cao Bằng tá môi pâ lơ tâi tâng tơnêi dêi 31 to cheăm ƀă 3 pơlê kân tíu tơkăng kong (sap cheăm Cần Nông, tơring Hà Quang troh cheăm Đức Long, tơring Thạch An). Ngế pro xiâm hnê ngăn tơnêi têa tối nhên, Kơpong cheăng kâ tê mơdró tơkăng kong dêi Cao Bằng hiăng châ kĭ pơkâ a khế 3/2022, kố cho tơdroăng mơhnhôk mơnhông nếo dêi kong pơlê Cao Bằng.

Vâ pêi tơdroăng mê, Ngế pro xiâm hnê ngăn tơnêi têa pơkâ thế kong pơlê tơbleăng mâu tơdroăng cheăng pêi mê pơtối hbrâ, mơjiâng troăng tơkăng kong hơniâp, tơrŭm, mơnhông pơla Việt Nam - Sinuâ. Kơxê lơ 16/1, pôa Phạm Minh Chính, Ngế pro xiâm hnê ngăn tơnêi têa rơtế ƀă mâu kăn Chin phuh pêi cheăng ƀă kăn hnê ngăn kong pơlê Cao Bằng.