Xông tơpui a roh hôp, pôa Phạm Minh Chính, Ngế pro xiâm hnê ngăn tơnêi têa tối ăm ‘nâi, pơla kố nah, Chin phuh hiăng mơnhên pơkâ tơtêk GDP hơnăm 2025 sap 8,3 – 8,5% ƀă hiêm mơno tơtêk rĕng, tơtêk hên laga thế krá tơniăn; tung mê mơnhông khoa hok kŏng ngê̆, pơhlêh nếo tơmiêt pêi rơkê, pơhlêh xúa kŏng ngê̆ cho môi troăng pêi ki kal.

Ngế pro xiâm hnê ngăn tơnêi têa pơkâ thế mơnhên nhên mâu hnoăng cheăng ƀă tơmeăm ki nhên dêi mâu khu xiâm, kơvâ cheăng, kong pơlê tung khế 7, quý pái ƀă mâu khế mơ’nui hơnăm. Tung mê, rah xo rêm tơdroăng  mơjiâng ‘noăng chư chêh, ki rơhêng vâ tối cho ‘noăng chư chêh pơkuâ tơnêi tơníu. Ngế pro xiâm hnê ngăn tơnêi têa pơcháu Khu xiâm pơkuâ liăn ngân xing xoăng tŭm liăn ngân tơnêi têa tơniăn kơxô̆ liăn ƀă mơngế pêi cheăng pêi pro châ tơƀrê dêi mâu tơdroăng, pơkâ pêi, tơdroăng tơkêa bro, thế mơ’no liăn cheăng tro kơlo, châ tơƀrê, tro xiâm kối, tơdroăng ki xiâm.