Ngế pro xiâm hnê ngăn tơnêi têa phiu ro tơdroăng Grup pơkuâ Dunamu dế hriăn plĕng mơ’no liăn ƀă mơnhông a Việt Nam, ki rơhêng vâ tối tung kơvâ tơmeăm kŏng nghê̆, tơmeăm mah hŏa; tơdrêng amê kheăn kơdeăn tơdroăng veăng gum dêi Grup pơkuâ Hana tung mơnhông cheăng kâ Việt Nam ƀă hnoăng cho khu tơrŭm ki kal dêi MB.

Mơhnhôk mâu grup po rơdâ mơ’no liăn hceăng a Việt Nam, Ngế pro xiâm hnê ngăn tơnêi têa tối ăm ‘nâi MB cho hngêi arak liăn loi tơngah dêi Việt Nam ƀă pơkâ thế MB rơtế 2 grup tơrŭm krá tơniăn, châ tơƀrê, kum mơdêk tơrŭm cheăng ton xŏn tâi tâng Việt Nam – Hàn Quốc. Ngế pro xiâm hnê ngăn tơnêi têa pơcháu Khu xiâm pơkuâ liăn ngân ƀă hnoăng ki xiâm mơjiâng Tơdroăng pơkâ mơnúa kơchơ mơdró tơmeăm mah hŏa a Việt Nam, pơtối tơrŭm ƀă Hngêi arak liăn Tơnêi têa Việt Nam ƀă mâu khu xiâm, kơ koan, kong pơlê ki tơdjâk, tŏng gum mâu grup pơkuâ tung tơdroăng ti tăng plĕng, hriăn plĕng mơ’no liăn cheăng a Việt Nam.