Pôa Phạm Minh Chính, Ngế pro xiâm hnê ngăn tơnêi têa tơdah ƀă tơpui tơno ƀă Ngế pro xiâm hnê ngăn kong têa Ethiopia
Thứ tư, 14:09, 16/04/2025
Tơplôu: A Sa Ly/VOV
Tơplôu: A Sa Ly/VOV
VOV.Xơ Đăng – Tiô rơkong krếo thế dêi pôa Phạm Minh Chính, Ngế pro xiâm hnê ngăn Chin phuh Tơnêi têa Kŏng hoa xah hô̆i chuh ngiah Việt Nam, Ngế pro xiâm hnê ngăn kong têa Kŏng hoa Yân chuh Liên ƀang Ethiopia Abiy Ahmed Ali lăm pôu pêi cheăng Việt Nam ƀă veăng Hneăng hôp kân Hôp tơpui tơno Khu tơrŭm cheăng xua Tơtêk ngiât lĕm ƀă Pơkâ xiâm lâp plâi tơnêi (P4G) roh má Pŭn sap ing hâi lơ 14 troh hâi lơ 17/4.
Kơxê lơ 15/4, a Tíu pêi cheăng Kăn xiâm hnê ngăn tơnêi têa, pôa Phạm Minh Chính, Ngế pro xiâm hnê ngăn tơnêi têa hiăng pơkuâ roh leh tơdah păng ‘nâng Ngế pro xiâm cho pôa Abiy Ahmed Ali. Klêi leh tơdah, péa pâ hiăng tơkŭm tơpui tơno. Tung mâu hơnăm achê kố, pêi lo liăn pơla péa pâ Việt Nam – Ethiopia châ lối 10 rơtuh dollars/hơnăm.
Hơnăm 2024 pơla kố nah, pêi lo liăn pơla péa pâ châ lối 13 rơtuh dollars, tung mê tê ngi kong têa ê dêi Việt Nam châ lối 7 rơtuh dollars ƀă rôe lối 6 rơtuh dollars. Việt Nam ƀă Ethiopia đi đo tŏng gum dêi pó a mâu troăng pêi, hôp tơpui tơno hên pâ. Ethiopia hiăng păng ‘nâng mơnhên Việt Nam cho tơdroăng cheăng kâ tíu tê mơdró a hơnăm 2014.
Viết bình luận