Cheăng kâ, rêh ối kong pơlê Dak Lak tung khế 4 ƀă 4 khế apoăng hơnăm 2025 pơtối tâk tơniăn, hên tơdroăng pơkâ pêi châ tơƀrê, pro xiâm krá kak ăm tơdroăng pêi klêi mâu pơkâ mơnhông cheăng kâ tung plâ hơnăm. Tơdroăng kố châ tơbleăng a rôh hôp tiah hmâ khế 4 dêi Vi ƀan kuăn pơlê kong pơlê Dak Lak, tơkŭm po a kơxo hâi lơ 13/5.

Môi tung mâu tíu ki tơƀrê tung pêi cheăng ƀă kơmăi kơmok tâk hên, ƀă kơxô̆ tâi tâng kơvâ cheăng tung khế 4 tâk lối 12% tâng vâ pơchông ƀă  hơnăm nah, malối ‘na tơdroăng cheăng pêi ƀă kơmăi kơmok, uâ pơliê pro tâk vâ chê 17%. Mâu kơvâ cheăng ki xiâm, mê cho: kơphế,  pro meăm, pro ƀiê̆r, on tơhrik pơtối rak ki tơniăn. Pêi chiâk deăng, pêt rak ngăn loăng kong ƀă păn ká pơtối tơniăn. Pôa Nguyễn Thiên Văn,  ngế pơtân pro Kăn hnê ngăn Vi ƀan kuăn pơlê dêi kong pơlê Dak Lak tối nhên, rêm râ, kơvâ cheăng kal tơkŭm tah tơdroăng xơpá tung pêi cheăng kâ - pêi pro tơmeăm, mơdêk xo liăn ngân ‘no mơjiâng tơmeăm khoăng tơnêi têa, ‘mâi hơ’lêh tơdroăng pro hlá mơ-éa ƀă kơjo gum khu mơdró, vâ rak tơniăn pê klêi pơkâ mơnhông cheăng kâ rêh ối pơlê pơla hơnăm 2025.