Nôkố lâp tung kong pơlê ai dâng 10.000  khu mơdró kŭn ƀă krâ kơvâ, la ki hên pêi kŭn, ôh tá rơdêi, trâm hên xơpá ‘na liăn ngân, kŏng ngê̆ ƀă tăng tíu vâ rôe. Hlá mơ-éa chêh Pơkâ vâ tah ki xơpá, pro tơ’lêi hlâu xiâm tăng liăn, pơ’lêh mâu pơkâ mơnhông cheăng kâ krê dêi kuăn pơlê chiâng tơdroăng mơhnhôk pêi ki kal dêi cheăng kâ, hlối tơbleăng pêi tơdroăng Pơkâ 68 dêi khu xiâm Kal kí ‘na mơnhông cheăng kâ krê dêi kuăn pơlê tung tơdroăng rêh ối nếo nôkố.

A rôh hôp, mâu kăn veăng hnê tối ‘na mâu tơdroăng kal tŏng gum mê cho hnê ‘na xúa tuăn ngôa rơkê, mơhnhôk tê mơdró, tơbleăng tung hlá tơbeăng hyôh rơ’jíu, mơdêk tơrŭm tung pêi cheăng. Hên ngế tối thế tơ’nôm pêi ahdrối ăm khu mơdró ki pơxiâm pêi cheăng, pơ’lêh hriĕn plĕng ki nếo, pơ’lêh kơxô̆ ƀă ‘no liăn pêi chiâk xúa kơmăi ki dâi lĕm.