Pôa Trần Quang Bình, ngế ki pơkuâ môi tíu tê mơdró mơjiâng pro tơmeăm a Dak Lak, ai 5 to tơmeăm dế pro mê tá 5 to tơmeăm mê pơrá dế tro pơtê pro xua ôh ti ai prêi. Maluâ hiăng mơhnhôk tâi tâng tâi tâng mâu tíu ki hmâ ‘nâi la xuân ôh ti ai prêi vâ roê. Pôa Bình tôu tuăn xua tíu mơdró kâ dêi tơná mơni kô tro khu ki ‘no liăn pro phâk xua hrá pro klêi:

“Tíu pêi cheăng dế tơbleăng pro mâu tơmeăm a Dak Lak ƀă Dak Nông. Hdrối nah, rêm rôh khĕn vâi chôu ăm prêi vâ pro mê ngế ki pơkuâ tíu ki tê prêi mê chơ ok ăm tơdrêng hlối ƀă yă dâng 300 rơpâu liăn tung môi khô̆i. To lâi hâi vêh ngi kố, krếo phôn mâu tíu ki roê tê prêi mê yă tê hiăng to ing 70 – 80%, la ôh ti ai prêi vâ roê. Yă prêi to kơnâ pakĭng tơdjâk troh tơdroăng tơkêa pro, mê ối tơdjâk troh tơdroăng ki pro. Tâng hrá ngế ki ‘no liăn pro kô phâk liăn, mê pâ thế mâu khu râ, kơvâ cheăng ki ai tơdjâk troh tơmâng ngăn troh tơdroăng kố”.

Bối ƀă tơdroăng dêi pôa Trần Quang Bình cho tơdroăng ki yă prêi to kơnâ tung lâp lu. Séa ngăn a pơlê kong kơdrâm Ƀuôn Ma Thuột, mâu tơring Čư̆ Mgar, Krông Ƀuk, Ea Hleo, pơlê kong krâm Ƀuôn Hồ ƀă hên mâu tơring ki ê ăm hlo mâu tíu ki ‘nâ tâk vâ châ péa xôh tâng vâ pơchông ƀă kơtăn kố 1 khế. Nâ Tạ Bích Trâm, ngế ki pơkuâ môi tíu tê hmốu prêi a bêng Tân Lợi, Pơlê kong kơdrâm Ƀuôn Ma Thuột, ăm ‘nâi dâng 1 khế hdrối, yă prêi a kơlo lối pá xôp 300 rơpâu liăn môi khô̆i, mê nôkố cho lối 500 rơpâu liăn môi khô̆i. Maluâ yă prêi “to kơnâ” la hên tíu tê xuân ôh ti ai prêi vâ tê.

“Nôkố tơdroăng ki roê prêi rế hía rế ôh ti ai tá mâu tíu tê ngin kố mê ôh ti tối ƀă kuăn pơlê. Môi khế hdrối á krếo mê tíu ki hrik prêi vâ chơ ok ăm tơdrêng hlối, riân dâng vâ chê 300 rơpâu liăn tung môi khô̆i, la nôkố hiăng tâk troh 500 rơpâu liăn tung môi khô̆i. Yă prêi to kơnâ tiah mê chiâng pro pá ăm mâu tíu tê môi tiah ngin ƀă kuăn pơlê roê pro hngêi. Maluâ yă to kơnâ tiah mê krếo vâi chơ ăm xuân ôh ti ai prêi vâ tê. Prê hiăng ôh ti ai mê meăm, hmốu, xơmong xuân ôh tá châ tê, xua ôh ti ai prê vâ hơ’lâk pro hngêi. Ngin nôkố tê mơdró chiâng xơpá khât”.

‘Na tơdroăng kố, môi ngế kăn pơkuâ Khu ngăn chiâk deăng ƀă Hyôh kong prâi kong pơlê Dak Lak ăm ‘nâi, ki xiâm chiâng ai tơdroăng yă prê to kơnâ cho xua kơdró têa kroăng hiăng xiâ, hên plong tuk ki vâ hrik prê ôh tá chiâng vâ to hrik prêi môi tiah hmâ. Pakĭng mê, hên tơring dế hrik hiăng tâi hâi khế séa ngăn ki krá tơniăn, dế tơkôm pro hlá mơ-éa séa ngăn ki krá tơniăn vâ ai tŭm tơdroăng xúa tiô pơkâ dêi luât. Vâ ‘mâi mơnhông, Khu ngăn hyôh kong prâi hiăng pơkâ thế mâu tíu pêi cheăng ki châ hbru ăm phêp kal mơdêk rơdêi tơdroăng ki hrik, tơdrêng amê hlối rak vế tơniăn tro pơkâ luât vâ pêi pro châ tơdroăng púi vâ dêi kơchơ mơdró.

Laga tơdroăng têa kroăng xiâ xơpá vâ hrik xo prêi hơnăm ki lâi xuân ai a Dak Lak; mâu plong tuk xuân hiăng tâi hâi khế chêh inâi séa ngăn ki krá kâk, mê tơdroăng ki ôh tá ai prêi vâ pro hngêi pro yă to kơnâ a Dak Lak cho xua ing tơdroăng ki ê.

Trung tă Nguyễn Đức Duy, phŏ ngế pơkuâ Ƀơrô cheăng Kăn sat Cheăng kâ, Kŏng an kong pơlê Dak Lak ăm ‘nâi, hâi lơ 5/5, Khu xiâm ngăn Kŏng an pơtroh hlá mơ-éa hnê mơhno kŏng an mâu kong pơlê, pơlê kong kân séa ngăn tâi tâng tơdroăng cheăng hrik xo, pơto chơ ƀă tê prê, hmốu tung têa kroăng hơ’lâk pro hngêi. Ƀơrô kăn sat cheăng kâ dế tơrŭm ƀă Ƀơrô Kăn sat gâk troăng prôk Kŏng an mâu tơring tơbleăng lăm ngăn tâi tâng a 21 khu mơdró kâ hrik xo prêi, hmốu a kong pơlê. Laga, ki xiâm séa ngăn kố cho vâ rak tơniăn tung tơdroăng hrik xo prêi, pơto chơ ƀă tê prê hmốu, xơmong.

Kuăn pơlê tối tiah kố, tơdroăng ki lăm ngăn dêi kơvâ cheăng kŏng an pro khu mơdró kâ pơtê pơtân cheăng hrik xo prêi, chiâng pro prêi ôh ti ai ƀă yă tê to kơnâ, cho ôh ti tơdroăng:

“Tơdroăng ki séa ngăn kố cho vâ vêh pro tơniăn cheăng hrik xo, tê mơdró prêi. Khu mơdró kâ xuân ăm phêp hrik, tê tiô luât pơkâ. Tâng tung pơla séa ngăn, ngin châ hlo khu mơdró kâ lơ khu tơrŭm, ngế krê ki lâi ai tơdroăng ki gô̆m prê hmốu tơkôm to kơnâ vâ tê, pro mâu hmốu prê tung kơchơ tê mơdró ôh ti ai hlo tơdroăng pro xôi luât, ngin kô pơxâu phâk kơtăng, ví mâu ngế ki pro mơdêk tê yă prê to kơnâ”.

Tơdroăng ki ôh ti ai prê vâ pro hngêi dế tơdjâk ó troh tơdroăng ki pro hngêi lơ mâu tơdroăng ki ê a Dak Lak, mơdêk khu mơdró kâ ƀă kuăn pơlê chiâng trâm pá. Yă prê to kơnâ ôh ti xê to tơdjâk troh ‘no hrê liăn ngân, mê ối pro chiâng pơtê mâu tơdroăng ki dế pro, pro hên tíu tê prêi xơmong trâm tơdroăng ki tê mơdró xơpá. Maluâ kơvâ cheăng ki ai tơdjâk troh hiăng tŏng gum vâ ‘mâi rơnêu tơdroăng hrik xo, pơto chơ prêi ƀă tê prêi, la ối kal ai troăng hơlâ pêi pro ki tâi tâng vâ rak tơniăn tơdroăng ki tê, ví tơdroăng ki ôh ti ai prêi vâ tê môi tiah hdrối nah.

Tung pơla tơdroăng vâ roê pro tơmeăm rế hía rế hên, tơdroăng pơkuâ, séa ngăn kơchơ mơdró hmốu prê xơmong tiô túa ki tơdrăng, tơƀrê cho pơkâ thế kal pêi tơdrêng, vâ pro tơdâng tơ’mô pơxúa pơla Tơnêi têa, khu mơdró kâ ƀă kuăn pơlê.