Klêi kơ’nâi lối 2 khế mơhnhôk pêi pro, hiăng ai vâ chê 1.000 ƀai veăng tơ’noăng dêi mâu văn ngê̆ sih, kăn ƀô̆, mâu mô đô̆i a mâu đông mô đô̆i gâk tơkăng kong, Khu xiâm pơkuâ Mô đô̆i ƀă mâu hngêi trung hriâm tung kong pơlê veăng. Tiô Khu tơkŭm po, mâu ƀai tơ’noăng rơkê lĕm, chêh i nhên, rơrêk tung hiâm mơno um méa mô đô̆i gâk tơkăng kong plâ hâi măng kŏng krá râng hnêa gâk kring hnoăng pơkuâ, gâk kring tơkăng kong, tơdrêng amê cho mâu ngế kuăn ki achê, ối achê ƀă vâi krâ kuăn pơlê mâu hdroâng kuăn ngo.

   Tơkâ hluâ vâ chê 1.000 ƀai veăng tơ’noăng dêi mâu ngế ki hmâ chêh rêm hâi ƀă ton ton nếo chêh tung kong pơlê, o Dương Thị Hải Như, hok tro lâm 8G, Hngêi trung Râ má péa Trưng Vương (Pơlê kong kơdrâm Ƀuôn Ma Thuột) hiăng rơkê châ kâ pri Má môi roh tơ’noăng ƀă ƀai chêh ‘’Hơ-ui pơtroh plâi nuih tíu tơkăng kong dêi kuăn’’.