Kơxo lơ 13/5, a Hneăng hôp Kuô̆k hô̆i, Chin phuh hiăng pơchuât tơbleăng Pơkâ ‘na mơdon hâi khế ôh tá nâp hnoăng liăn mơhá xúa tơnêi pêi chiâk châ pơkâ tơdroăng Pơkâ kơxô̆ 55 dêi Kuô̆k hô̆i ‘na ôh tá êa nâp, kơdroh hnoăng mơhá xua tơnêi pêi chiâk hiăng châi ‘mâi pơhlêh, ‘mot tơ’nôm mâu tơdroăng tiô Pơkâ kơxô̆ 28.

Tiah mê, tơdroăng ki pơtối ôh tá êa nâp hnoăng liăn mơhá mung tơnêi pêi chiâk vâ pơtối pơhlêh túa tơmiât, troăng pơkâ, troăng prôk dêi Đảng ƀă Tơnêi têa ‘na pêi chiâk, kuăn pơlê pêi chiâk, thôn pơlê; tơdrêng amê hlối tŏng gum kuăn pơlê pêi chiâk, mơhnhôk mơnhông pêi chiâk deăng . Troăng hơlâ tŏng gum ôh tá êa nâp hnoăng liăn mơhá mung tơnêi pêi chiâk châ pêi sap ing hơnăm 2001 troh nôkố, tâi tâng kơxô̆ liăn ôh tá êa nâp, kơdroh vâ chê 120 rơpâu rơtal.

Krê  pơla hơnăm 2021 – 2023 la ngiâ rêm hơnăm kơdroh dâng 7.500 rơtal liăn. Tung tơdroăng mơjiâng pro, tê mơdró nôkố, ki hên mâu rơkong tơpui tối môi tuăn ‘na ki kal pro mơdon troăng tŏng gum mung tơnêi pêi chiâk troh tâi hơnăm 2030 môi tiah pơkâ mơ’no dêi Chin phuh.