Diâp inâi ‘’Pơlê kong kân Khên tơnôu’’ ăm Pơlê kong kân Hải Phòng ƀă xông tơpui a leh tơbâ, teăng mâ khu râ kăn pơkuâ Đảng, Tơnêi têa, pôa Lương Cường, Kăn xiâm hnê ngăn tơnêi têa rơkâu, kheăn kơdeăn mâu tơdroăng châ tơƀrê ƀă mâu tơdroăng veăng gum kân khât tung tơdroăng tơplâ tơbriât châ tơniăn krê hdroâng mơngế; xuân môi tiah tung tơdroăng pơhlêh nếo, mơjiâng, mơnhông mơdêk tơnêi têa ƀă gâk kring krá tơniăn Tơnêi têa Việt Nam xah hô̆i chuh ngiah dêi Đảng ƀô̆, khu râ kăn pơkuâ, kuăn pơlê ƀă Khu lêng Pơlê kong kân Hải Phòng tung 70 hơnăm hiăng hluâ.

Pôa Lương Cường  loi tơngah, ƀă khôi túa vâi krâ nah tơdroăng roh ton nah khên tơnôu; mâu tơdroăng châ tơƀrê ƀă túa ki rơkê tơtro kơnía klêi kơ’nâi 70 hơnăm tơleăng lĕm Đảng ƀô̆, khu râ kăn pơkuâ, khu lêng ƀă kuăn pơlê dêi Pơlê kong kân Hải Phòng kô pơtối tơrŭm môi tuăn, tơkâ hluâ pá puât, pơloăng mơnúa, tơkŭm mơjiâng pơlê kong kân mơnhông mơdêk rĕng, krá tơniăn, kro mơdrŏng lĕm, rơkê ƀă lĕm, kuăn pơlê ai tơdroăng rêh ối hơtô, hơniâp lĕm.