Pôa Trần Đức Lương, Kăn xiâm hnê ngăn tơnêi têa hneăng hdrối kot mâ hâi lơ 5 khế 5 hơnăm 1937 a cheăm Phổ Khánh, kong pơlê Quảng Ngãi. Pôa veăng kăch măng khế 02 hơnăm 1955. Sap ing khế 2/1955 troh khế 9/1955 pôa lo lăm a peăng kơnhŏng tơnêi têa pêi cheăng, hriâm sơ câ̆p kơvâ đĭa chât. Kơ’nâi mê, pôa pêi cheăng a Khu Đĭa chât 20 ƀă mâu tíu pêi cheăng ing nhân viên kih thuât, đô̆i trương đô̆i đĭa chât troh phŏ đoân kih thuât. Kơ’nâi môi pơla hriâm a Đăi hok Mỏ - Đĭa chât, plâ péa chât hơnăm apoăng dêi tơdroăng cheăng, pôa hiăng lăm pêi cheăng lâp mâu kơpong kong ngo ngối, séa ngăn ƀă hriăn plĕng đĭa chât, kum kal khât tung tơdroăng mơjiâng ‘noăng chư chêh loăng pơlái kong kế, tơnêi tơníu tơnêi têa kum mơnhông cheăng kâ – rêh ối pơlê pơla.

Pôa chôa ‘lâng châ pơcháu hên hnoăng: Phŏ Kăn pơkuâ Kơ koan xiâm Lơgât tơnêi tơníu, Kăn xiâm pơkuâ Kơ koan xiâm Đĭa chât; Phŏ pơkuâ klêi mê Kăn pơkuâ Vi ƀan Khoa hok ƀă Kih thuât dêi Kuô̆k hô̆i.

Mâu khu pú dêi pôa Trần Đức Lương tung kơvâ đĭa chât xuân rak mâu tơdroăng tơbâ ‘na pôa, khu pú, ngế kăn pơkuâ ki lĕm, pêi cheăng tâi hiâm mơno. Khéa hơ’nêng ‘na tơdroăng ki kơtê ihiâm dêi pôa Trần Đức Lương, Kăn xiâm hnê ngăn tơnêi têa hneăng hdrối, Tiê̆n sih đĭa chât Nguyễn Thành Vạn, Phŏ pơkuâ Kơ koan xiâm lơgât Đĭa chât ƀă Tơmeăm khoăng tung kơdâm tơnêi Việt Nam (Khu xiâm pơkuâ ‘na pêi chiâk deăng ƀă Kong prâi) tối:

 "Ƀă á, pôa Trần Đức Lương, Kăn xiâm hnê ngăn tơnêi têa hneăng hdrối ngin xuân krếo cho achê hmâ xah dêi pó cho ngoh Trần Đức Lương. Ngoh cho môi ngế ngoh ƀă cho môi ngế thái. Ngoh pêi cheăng cho kơtăng khât ƀă ai môi tơdroăng châ achê ƀă mâu tơdroăng dêi đĭa chât ƀă ai mâ ngăn cho khoa hok. Ngin pêi cheăng tơdrêng ƀă mâu ngế rơkê Liên Xô, ngoh gá hriâm xêh mê ngoh ối tơpui nâl Rusi cho rơkê, ngoh tối tâi tâng mâu tơdroăng ƀă nâl Rusi tơdrêng ƀă mâu khu ngế rơkê đĭa chât, mâu ngế rơkê Liên Xô xuân bê ôh tá bĕng ê. Mâu tơdroăng đĭa chât ki la ngia angin pơkuâ pêi, ngoh pơrá ai mâu tơdroăng mơnhên ƀă veăng tơpui, tối ăm, mơnhên troăng prôk cho kal khât. Ngih xuân djâ ƀă hnê mơjiâng á hên ƀă á hriâm châ hên hiâm mơno ki lĕm dêi ngoh Trần Đức Lương.’’

 Sap hơnăm 1987 troh khế 8/1992, pôa Trần Đức Lương châ rah cho pro Phŏ Kăn hnê ngăn Hô̆i đong Ngế xiâm (nôkố cho Phŏ Ngế pro xiâm hnê ngăn Chin phuh), tơdrêng amê cho Kăn teăng mâ hnê mơhno má môi Việt Nam a Hô̆i đong Tŏng gum Cheăng kâ. Ƀă ing khế 9/1992, pôa to pro Phŏ Ngế pro xiâm hnê ngăn tơnêi têa troh hơnăm 1997. 10 hơnăm pro Phŏ Ngế pro xiâm hnê ngăn tơnêi têa, xuân cho rơxông tơnêi têa pêi pro kơtăng troăng hơlâ pơhlêh nếo dêi Đảng, pơhlêh tơná ing tơdroăng cheăng kâ tơkŭm mê chiâng cheăng kâ kơchơ mơdró kân pêi tiô troăng xah hô̆i chưh ngiah ƀă trâm hên mâu tơdroăng pá puât.

Drêng mê nah, krê pôa Trần Đức Lương, Phŏ Ngế pro xiâm hnê ngăn tơnêi têa hiăng rơtế ƀă khu pú hên Chin phuh pôu râng tơdroăng hên hĭn tung hneăng apoăng pơhlêh nếo vâ djâ tơnêi têa chôa ‘lâng hlŭn ing pá puât, kum pro chiâng mâu tơdroăng châ tơƀrê dêi tơdroăng pơhlêh nếo.

Tâ nhuô̆m mơngế rơkê plĕng tơdroăng rêh ối ƀă tơdroăng cheăng dêi pôa Trần Đức Lương, Kăn xiâm hnê ngăn tơnêi têa hneăng hdrối pleăng ăm tơnêi têa, tung mê hneăng pôa pro Phŏ Ngế pro xiâm hnê ngăn tơnêi têa, PGS.TS Bùi Thị An, Kăn teăng mâ Kuô̆k hô̆i hneăng má 13, Kăn pơkuâ Kơ koan xiâm loăng pơlái kong kế, Kong prâi ƀă Mơnhông pơlê pơla, Phŏ Kăn hnê ngăn Khu tơrŭm mâu Khu pơkuâ Khoa hok ƀă Kih thuât Hà Nội tối:

"Hneăng pôa Trần Đức Lương pro Phŏ Ngế pro xiâm hnê ngăn tơnêi têa, tơnêi têa dế pá puât. Laga pôa hiăng mơ-eăm hên, mơ-eăm tâi ivá tơná ƀă Chin phuh, pôa hiăng mơ-eăm dêi châ tơná, ƀă ivá dêi tơnêi têa pin ƀă kơ’nâi mê mâu khu pú veăng séa ngăn ai rah xo mâu túa ki rơkê tơtro dêi kong têa ê vâ djâ tơnêi têa tơkâ hluâ hneăng ki pá mê chôa ‘lâng mơ-eăm xông tơtêk ‘na cheăng kâ, ‘na tơdroăng kal kí tơniăn, tíu cheăng dêi tơnêi têa châ tơtêk. Tung mê ai mâu tơdroăng veăng kum dêi Pôa Trần Đức Lương ƀă hnoăng cho Phŏ Ngế pro xiâm hnê ngăn tơnêi têa, pơkuâ ‘na kơmăi kơmok cho pá puât, mê hiăng mơ-eăm xông tơtêk’’.

Tung péa hneăng pro Kăn xiâm hnê ngăn tơnêi têa (1997 – 2006), pôa Trần Đức Lương hiăng ai mâu tơdroăng veăng kum kân tung tơdroăng tơpui kâ tung tơnêi têa ƀă kong têa ê, kum rak krá tơniăn kal kí, mơdêk mơnhông cheăng kâ ƀă thăm pro tíu cheăng lâp plâi tơnêi dêi Việt Nam. Pôa Trần Đức Lương tơmâng troh tơdroăng mơjiâng tơnêi têa tiô hnoăng xah hô̆i chuh ngiah, mơdêk pơhlêh pơkuâ tơnêi têa, mơdêk hnoăng dêi luât tung tơdroăng rêh ối pơlê pơla. Tung pơla kố, mâu tơdroăng pơhlêh ‘na pơkâ pêi, khu pêi cheăng tơnêi têa ƀă pro mơ-éa chôa ‘lâng châ pêi pro, mơjiâng xiâm kối ăm tơdroăng rơxông nếo ƀă mot tơrŭm cheăng.

Ngế chêh hlá tơbeăng Hà Đăng, Kăn pơkuâ Tơdroăng tơmiât – Khôi túa lĕm tơnêi têa tối ‘na mâu tơdroăng ki pro pâ vế tung tuăn ngôa dêi pôa Trần Đức Lương, Kăn xiâm hnê ngăn tơnêi têa:

"Pôa Trần Đức Lương pro Kăn xiâm hnê ngăn tơnêi têa xuân lôi ăm hên tơdroăng ki pâ vế tung tuăn ngôa. Laga mê cho tơdroăng pêt mơjiâng tơmeăm dêi pin dế to, laga xuân trâm hên pá puât xua pôa Trần Đức Lương hiăng tơmâng hên troh tơdroăng mơnhông cheăng kâ, mơnhông cheăng kâ rêh ối pơlê pơla dêi pin. Mơnhông troăng prôk dêi pin. Pôa Trần Đức Lương xuân cho môi ngế Kăn xiâm hnê ngăn tơnêi têa ai tuăn pâ trâu hơngế ƀă kuăn pơlê, nhŏng o ƀă khu râ kăn ƀô̆ xuân tiah mê. Mâu tơdroăng pôa pêi châ pâ vế tiô hâi khế pôa tơleăng mâu tơdroăng cheăng pêi dêi Kăn xiâm hnê ngăn tơnêi têa’’.

Ôh tá xê to môi kăn pơkuâ ai râ kân, pôa Trần Đức Lương, Kăn xiâm hnê ngăn tơnêi têa ối cho môi đảng viên môi hiâm mơno, plâ rơxông mơ-eăm xua kŏng sản. Sap ing hơnăm 1959, pôa hiăng ối tung khu dêi Đảng, Tơkâ hluâ 65 hơnăm pơtâp, pleăng hnoăng cheăng đi đo. Hmâ pôu râng hnoăng cheăng ki lâi pôa đi đo mơhno hiâm mơno djâ troăng ahdrối, trâm achê ƀă kuăn pơlê. Ƀă mâu tơdroăng veăng gum kân ăm tơnêi têa, pôa Trần Đức Lương hiăng châ Đảng ƀă Tơnêi têa diâp hên pri ki kơnía môi tiah Mê dái Hơlŏng trĭng, Medái 65 hơnăm Đảng ƀă hên Mê dái, huy chương, pri, inâi kơnía kân ki ê dêi Việt Nam ƀă lâp plâi tơnêi.

 Pôa Trần Đức Lương, Kăn xiâm hnê ngăn tơnêi têa hneăng hdrối kơtê ihiâm. Đảng, Tơnêi têa ƀă kuăn pơlê Việt Nam hía môi ngế kăn pơkuâ ai troăng ngăn hơhngế, tá hiâm mơno ƀă đi đo pêi cheăng ăm ki pơxúa dêi tơnêi têa ƀă kuăn pơlê ahdrối. Tơdroăng rêh ối ƀă pêi cheăng dêi pôa cho um méa ki eăng ăm mâu rơxông kăn ƀô̆, đảng viên tiô ƀối./.