Tung 8 hâi, ƀă lối 80 tơdroăng pêi cheăng, pôa Tô Lâm, Kăn xiâm pơkuâ hnê ngăn Đảng hiăng ai roh tơpui tơno, trâm mâ ƀă Khu râ kăn xiâm mâu kong têa, trâm mâ ƀă tơpui tơno ƀă mâu Đảng xiâm, mâu khu râ kăn, khu tê mơdró, lăm pôu mâu tíu cheăng kâ, khôi túa lĕm tro, trâm mâ pơlê pơla mơngế Việt Nam a mâu kong têa. Kăn xiâm pơkuâ hnê ngăn Đảng hiăng veăng Leh tơbâ 80 hơnăm Hâi Ƀlêi trâng tung tơplâ xâ Gâk kring tơnêi têa a Rusi ƀă Kazakhstan, ing mê, mơhno tơdroăng ki nhuô̆m ƀă pôk pơ-eăng dêi Việt Nam ƀă mâu tơdroăng ki pleăng dêi mơheăm chhá, hía kân kĭn dêi mâu kong têa ối tung Liên Xô ton nah tung roh tơplâ xâ tơtrâ chuh ngiah phát xít, pơtê tơplâ lâp plâi tơnêi ƀă po tơdroăng ki nếo ăm tơdroăng cheăng kăch măng ƀă tơleăng lĕm hdroâng mơngế tung lâp plâi tơnêi, tung mê ai Việt Nam.

Mâu tơdroăng châ tơƀrê tung roh pêi cheăng kố cho tơdroăng ki kal, cho tơdroăng ki mơhnhôk ƀă cho tơdroăng ki xiâm mơhnhôk vâ Việt Nam ƀă mâu kong têa pơtối rak pêi tiô ton, mơnhông ƀă mơdêk ki kal tơrŭm cheăng tiô khôi vâi krâ nah, veăng kum tung hnoăng mơnhông mơdêk dêi rêm tơnêi têa, xua pơxúa dêi kuăn pơlê, xua vâ hơniâp lĕm, tơrŭm, mơnhông mơdêk a kơpong ƀă lâp plâi tơnêi./.