Pôa Phạm Minh Chính - Ngế pro xiâm hnê ngăn tơnêi têa tối nhên Việt Nam ƀă Pơhlăng ai tơdroăng tơrŭm cheăng ƀă dêi rơpó, sap ton nah, tơrŭm krá tung tŭm tơdroăng cheăng; tối Việt Nam đi đo ngăn Pơhlăng cho kong têa tơrŭm ki kal tung tơpui kâ dêi tơná. Ngế pro xiâm hnê ngăn tơnêi têa pơkâ thế péa pâ pơtối mơdêk tơpui tơno tơrá khu râ kăn, tơbleăng pêi tơƀrê tơdroăng tơpui tơno tơrá mâu kăn pơla pôa Nguyễn Phú Trọng, Kăn xiâm pơkuâ hnê ngăn Đảng ƀă pôa Emmanuel Macron - Kăn xiâm pơkuâ kong têa Pơhlăng khế 10/2023.

Tơdah jâ Carmen Cano de Lasala - Kăn teăng mâ Tây Ban Nha, Ngế pro xiâm hnê ngăn tơnêi têa Việt Nam tối đi đo nhoăm ƀă púi vâ  mơnhông tơrŭm cheăng ƀă Tây Ban Nha rế tơƀrê tâ nếo. Ngế pro xiâm hnê ngăn tơnêi têa pơkâ thế péa tơnêi têa mơdoh hên mâu rôh ki tơdroăng Kĭ tơhrâ EVFTA djâ ăm; pơkâ thế Tây Ban Nha po troăng rôe   mâu tơmeăm Việt Nam tê, malối cho tơmeăm pê lo ing chiâk deăng, điê̆n tưh, tơmeăm pơchoh hmân ếo.